Lo temps de l’Estivada es sovent l’ocasion de retrobar de coneissenças, de camaradas d’associacions e d’autres per discutir e debatre. Es dins aquesta amira que lei diferents actors dau “Manifèst Occitanista” se retrobèron dijòus passat a Rodés, venguts de Biarn, Provença, Òlt, dau País Tolosan, de Narbona, Montalban... Dempuei la darriera acampada de la fin dau mes de junh a Tolosa, aquela plataforma occitanista s’es trobada un nom, “Bastir”, amb un objectiu clar: leis eleccions municipalas de 2014. Se lo comitat de pilotatge de Rodés a pas encara oficializat lei diferentei candidaturas d’aqueu nòu movement, ne sabèm mai sus leis intencions de “Bastir”.

Lei candidats de la plataforma occitanista refusan de partir solets a aqueleis eleccions. S’agís d’èstre concrets e de bastir localament de coalicions amb leis autrei candidats que semblan mai pròches dau programa establit dempuei de mes dins d’acampadas que se debanèron un pauc pertot en Occitània. “Bastir” barra pas la pòrta a degun, “lei comitats actius dei diferents parçans occitans ont es lançada l’iniciativa se poiràn presentar amb la drecha, aitant coma amb lo PS, lo Frònt d’Esquèrra ò leis ecologistas”, declarèt au Jornalet Guilhèm Latruvèrsa. Lo conselhier regionau dau PÒC en Miegjorn-Pirenèus a pas paur d’enganar lo mond perque segon eu, “l’etiqueta es pas qu’una aisina e leis electors s’interèssan mai au fons dau projècte qu’es presentat”. Leis eventuaus futurs elegits municipaus de “Bastir” seràn d’alhors autonòms dins son mandat. Pasmens totei s’engatjaràn a votar en favor dau budget de la majoritat municipala, en se permetent de portar remarcas e criticas.

“Bastir”, que totjorn segon Guilhèm Latruvèrsa es compausat en majoritat per de mond que fan pas partida de movements politics occitans, a d’objectius pron clars per aqueleis eleccions de 2014. Per uei, i a pas mai de 20 elegits occitanistas dins lei ciutats occitanas. Espèran per l’an que ven mai ò mens 100 candidaturas e 50 elegits dins Occitània tota. Lei candidaturas sovent se faràn dins de pichons vilatges mai lei grandei vilas son tanben d’objectius: “Bastir” serà representat a Pau, Tolon, Aurenja, Lemòtges, Bègla, e bensai Tolosa e Ais de Provença.

En se dubrir a quasi totei lei formacions politicas francesas, la plataforma politica occitana vòu èstre eficaça e pesar per faire avançar lo combat per la lenga e per una societat mai decentralizada. Espèran que lo mond que son ja engatjats dins d’associacions occitanas faràn partida dau movement. L’estapa que ven serà la commemoracion de la Batalha de Murèth lo 14 de setembre. Aquí ne sauprem mai sus l’avançada dei candidaturas de “Bastir”.
 
 
 
 
Matieu Casanòva