Un inquietant netejatge etnic a luòc en Artsakh, un territòri tanben conegut coma lo Naut Karabagh, mas la comunautat internacionala se mòstra indiferenta a l’agression, çò rapòrta sus Vilaweb una analisi de Ferran Lupescu.

Segon Lupescu, après los conflictes anteriors, Azerbaitjan a entamenada una nòva ofensiva militara en cercant un remplaçament etnodemografic dels armènis autoctòns per de colons azèris. L’agression, qu’a menat a una reddicion incondicionala d’Artsakh, se tròba ara somesa al regim azèri del dictator İlham Əliyev que cèrca l’eliminacion dels armènis de la region amb lo sosten de la Turquia d’Erdoğan.

La comunautat internacionala a mantenguda una actitud passiva e, en qualques cases, a quitament sostengut Azerbaitjan, en ignorant las possiblas atrocitats e de crimes contra l’umanitat. Ara, Artsakh es en perilh de netejatge etnic total, e la comunautat internacionala, per ara, fa pas res.

De milièrs de desplaçats

Armenia anonciava dimars passat que 19 000 armènis d’Artskakh avián traversada la frontièra en fugir l’armada d’Azerbaitjan. Mentretant, l’armada d’Azerbaitjan enregistra en vidèo totes los òmes potencialament en edat d’èsser soldats, en cercar de suspèctes d’aver comeses de “crimes de guèrra”. D’ancians milicians armènis d’Artsakh an cremats lors unifòrmes per èsser pas arrestats.

En guèrra dempuèi 1988

Lo Naut Karabakh es una region de majoritat armènia que las autoritats sovieticas inseriguèron dins Azerbaitjan. Amb la desparicion de l’URSS, comencèt una guèrra de granda escala amb Armenia, que se concluguèt amb la mòrt d’environ 30 000 personas e la consolidacion d’una republica independenta de facto, la Republica d’Artsakh, reconeguda internacionalament sonque per Armenia.

La region a agut lo sosten de Russia pendent qualques decennis, mas l’acercament d’Armenia cap als Estats Units a virada la situacion. De son caire, Azerbaitjan recobrèt lo territòri perdut en 1994 e ocupèt una part del Naut Karabagh en 2020. Las tensions an portat un isolament de facto de la region, en talhar de provesiments e en favorir l’exili de la populacion armènia. Lo conflicte a daissat un grand nombre de mòrts dempuèi 1988 fins ara.

El primer ministre independentista de la República d’Artsakh (Nagorno-Karabakh) @RubenVardanyan_ humiliat públicament a Bakú per les tropes d’ocupació d’Azerbaidjan pic.twitter.com/bceyF99yVb

— Josep Lluís Alay (@josepalay) September 28, 2023