Patric Roux, en de declaracions a Jornalet, a qualificat d’incresables los arguments del conselhièr general per Rodés Èst, Bernard Saules, de retirar 75% de la subvencion al festenal occitan. Lo president del Senat, Jean-Pierre Bel, a fach un don de 15 000 èuros, la quantitat sostracha pel conselh general.

L’argument principal del conselh general es que l’organizacion del festenal presentèt pas la documentacion a temps. A aiçò Roux respond en disent que se presentèt una seguida de dorsièrs a las diferentas administracions: “cossí es possible qu’arribèrem a temps a totas levat del conselh general?”, çò demanda ironicament.
 
Un autre argument es que “la comission culturala del conselh general atribuís pas cap de subvencion als actes gratuits”, es a dire, que subvenciona solament los eveniments culturals de pagament. Amb aquela logica se subvenciona la cultura a qui la pòt pagar, es a dire als rics, mas pas als paures. A aquel contrasens Roux respond en revendicant amb conviccion l’accès gratuit a la cultura, e mai que mai a la cultura en occitan, per garentir qu’arribe a l’ensems de tota la societat. “Dins aquestes moments la gratuitat es una obligacion”, çò ditz.
 
En contrast amb la posicion del conselh general, ièr lo president del Senat vesitèt l’Estivada e faguèt un don d’un chèc per la valor de 15 000 èuros, la quantitat que lo conselh general a quitat de pagar. Lo president del Senat declarèt tanben que cal que la Republica Francesa signe ja la Carta Europèa de las Lengas Minoritàrias e Regionalas.
 
L’Estivada contunha d’enfortir los ligams amb Catalonha. Roux anoncièt qu’a signat ongan un acòrdi amb la Fièra Mediterranèa de Manresa (Païses Catalans) per desvolopar un espaci artistic natural entre Catalonha e Occitània. Soslinhèt qu’es mai aisit per un artista occitan de portar d’artistas occitans a Barcelona qu’a París e per un artista catalan es mai aisit far un concèrt a Rodés qu’a Madrid. Mercés a aquel acòrdi cada an la Fièra de Manresa prepausarà la participacion d’artistas catalans a l’Estivada e l’Estivada prepausarà d’artistas occitans per la Fièra.