L’abadiá impausanta del Mont Saint-Michel, levada sus un illon rocassós connectat per estrada amb la còsta de Normandia, recuperèt dimècres passat son insularitat pendent qualques minutas pr’amor d’una marèa nauta excepcionala e de las òbras que s’i fan, justament, perque plan lèu venga tornarmai una illa. Tre 1879, aquel monument singular declarat per l’UNÈSCO patrimòni mondial de l’umanitat perdèt lo caractèr insular amb lo bastiment d’una estrada. Cent trenta quatre ans puèi, las aigas an tornat cobrir pel primièr còp l’estrada d’accès, pendent qualques instants.
 
En 2006 comencèron las òbras (reconstitucion amb vidèo) per ensajar de recuperar la caracteristica originala d’illon, qu’es previst que, la prima de 2015, siá ja del tot entornejat d’aiga mercés a una nòva estrada enlairada que remplaçarà l’actuala, que fa la diga.