Aitor Carrera presente un obratge monumentau sus er occitan d’Aran, un atlàs lingüistic a on, per miei de tres centenes de mapes, presente eth patrimòni lingüistic aranés en tot catalogar e analisar ua grana quantitat d'ahèrs lingüistics que permeten de conéisher e diferenciar er occitan que se parle en diuèrsi airaus dera Val.

Eth projècte, frut d'ua recèrca de mès de 25 ans, intègre enquèstes dialectologiques e collectatges oraus de guaireben ua vintea de vilatges aranesi. Er atlàs aufrís ua vision detalhada e documentada des variacions lingüistiques, era etimologia des formes e solucions araneses, e es corresponentes de d’autes variantes occitanes e de d’autes lengües romaniques.

Era partida cartografica, qu’ei eth nuclèu der obratge, compde 18 seccions, majoritàriament centrades en familhes semantiques. Ath delà, er atlàs analise aspèctes fonetics e morfosintactics der aranés, en tot assolidar-se coma ua òbra de referéncia inigualabla.

Ei escrit en catalan.

CARRERA, Aitor. Petit atles lingüístic de la Vall d'Aran. Edicions Sidillà, 2023. 496 pagines. 40 èuros.