Lo Parlament Europèu condemnèt dijòus passat l’atac d’Azerbaitjan contra Artsakh, en lo considerar “planificat e injustificat”. Dins aquel sens, l’eurocambra demandèt de revisar las relacions de l’Union Europèa amb aquel estat. Dins una resolucion aprovada a la sedença d’Estrasborg —amb 491 vòtes en favor, 9 contra e 36 abstencions—, los eurodeputats qualifiquèron la situacion de netejatge etnic, sollicitèron de las autoritats competentas qu’adoptèsson de sancions contra los foncionaris del govèrn d’Azerbaitjan responsables de non complir pas l’alta al fuòc e de mancar als dreches umans. Al meteis temps, l’Eurocambra demandèt a l’UE e als estats membres qu’ofriguèsson sul pic tota l’assisténcia necessària per gerir l’arribada de refugiats, que segon Armenia supèra ja la chifra dels 100 000.

Los eurodeputats remembran que las autoritats d’Azerbaitjan devon garentir la seguretat de totas las personas de la region, e exigisson que se dobrisca una enquista sus totas las accions de las tropas azèris que pòscan èsser consideradas coma de crimes de guèrra.

Dins la meteissa resolucion, lo Parlament Europèu conclutz qu’Azerbaitjan es un país que “trespassa lo drech internacional e sos engatjaments”, e per aquela rason considèra quitament de suspendre l’aplicacion de l’acòrdi per l’expedicion de visats.

Enfin, la cambra conselha de reduire la dependéncia energetica de l’UE envèrs Azerbaitjan, que dempuèi l’esclatament de la guèrra en Ucraïna s’èra refortit las crompas de gas e de petròli. Segon las darrièras donadas publicadas per Eurostat, Azerbaitjan es lo cinquen provesidor de gas natural de l’UE.