Ailton Krenak es vengut lo primièr indigèna a far partida de la prestigiosa Acadèmia Brasilièra de las Letras (ABL). Poèta, escrivan, filosòf e environamentalista reconegut, Krenak a 70 ans e fa partida del pòble krekak, un pòble autoctòn originari de la val de Rio Doce dins l'estat de Minas Gerais.

L'eleccion d’Ailton Krenak coma academician aguèt luòc dijòus passat. Ocupa lo cadieral que fins ara aperteniá a istorian José Murilo de Carvalho, defuntat fa gaire. Lo vòte foguèt istoric. I aviá 14 candidats a ocupar la cadièra d’academician, e Ailton Krenak obtenguèt 23 vòtes dels 39 possibles, en superant d'autres candidats notables coma l'istoriana Mary Del Priore (12 vòtes) e Daniel Munduruku (4 vòtes). Aqueste darrièr es tanben indigèna e fa partida del pòble munduruku.

L’ABL saludèt la nominacion de Krenak en lo qualificant d’escrivan de tria e de figura centrala del movement literari indigèna del país en ne destacant l’engatjament per la diversitat.

Krenak es un famós cap del movement indigèna de Brasil. Foguèt membre de l'assemblada que redigiguèt la Constitucion de 1988, es tanben professor a l'Universitat Federala de Juiz de Fora e una votz plan influenciaira del movement ecologista brasilièr. Coma escrivan, comencèt son activitat en 1999, e a publicat d’òbras de granda reputacion dins la literatura brasilièra coma Ideias para Adiar o Fim do Mundo (D’idèas per remandar la fin del Mond) que foguèt un dels libres mai venduts en Brasil en 2021.