Lo vidèo d’onze segondas que s’i vei cossí desralha lo tren a Compostèla a fach lo torn del Mond. Los imatges son d’una camèra de seguretat, e s’es pas pogut encara saber qui las a publicadas. S’i pòt veire coma lo tren pren lo contorn a granda velocitat, coma los vagons del mièg desralhan, coma fan impacte contra lo talús e coma lo primièr vagon tomba. Lo sit web en espanhòl de la BBC a publicat una brèva analisi dels imatges, facha per l’expèrt en rets ferroviàrias de la revista britanica Rail News, Sim Harris.
 
En primièr luòc, Harris ditz que los imatges mòstran plan clar que lo tren anava a una velocitat nauta, d’entre 190 e 200 km/h.
 
“Se pòt veire clarament que la velocitat fa que las ròdas del tren fagan una pression enòrma contra la via, e après aquela pression i a un aument de la fòrça centrifuga, coma çò que se passa dins quin contorn que siá, que faguèt que i aguèsse lo desralhament”, çò ditz Harris. “Dins lo vidèo se vei que la seccion ont se passa l’accident es nòva”, çò apond, e considèra qu’aquò deuriá èsser pas un problèma. Ditz que la majoritat dels trens de las caracteristicas d’aquel Alvia deurián aver un sistèma de contraròtle automatizat amb una frenada automatica quand lo tren despassa la velocitat permesa.
 
Ditz, l’expèrt consultat per la BBC, que lo factor determinant de l’accident foguèt lo fach d’anar a una velocitat tan nauta, tan près d’una gara. “Perqué lo tren anava a aquela velocitat dins aquela zòna, dins una seccion près de Compostèla ont lo menaire deuriá aver amendrit la velocitat?”
 
Se la velocitat es la causa de l’accident, ditz que i a qualques questions que se cal pausar: “Lo tren aviá un sistèma de contraròtle automatizat? Se l’aviá, perqué foncionèt pas? S’aviá pas de sistèma de contraròtle automatizat, perqué l’aviá pas? Totes los trens modèrnes devon dispausar d’aqueles sistèmas. E fin finala, s’aviá un sistèma de contraròtle e se foncionava, perqué frenèt pas?”
 
 
Segon Michel Chevalet
 
De son costat, iTélé ofrissiá una entrevista de Michel Chevalet a prepaus d’aquel accident. Segon lo jornalista scientific, i a mai d’un factor, mas lo principal es aquel de la velocitat del tren al moment de la catastròfa. Lo cambiament de senhalizacion sus una porcion de la via empediguèt tanben lo frenatge automatic de foncionar, segon Chevalet.
 
 
http://www.itele.fr/monde/video/deraillement-les-precisions-de-michel-chevalet