Una seguida d’explosions ocasionèron de degradacions materialas importantas en Corsega dimenge 8 d’octòbre de ser. La tòca dels atacs foguèt d’abitacions, de lotiments en construccion e quitament un ancian centre dels impòstes. Pas cap de persona foguèt nafrada, çò rapòrta Le Monde.

Cinc residéncias, majoritàriament de residéncias segondàrias, situadas dins las comunas de Bastilicaccia, Tavacu, Vicu, Villanova e Vighjaneddu, foguèron tocadas per d'explosions quasi simultanèas entre 22h30 e 22h45, segon d’informacions del ministèri public d’Aiacciu reveladas per l'AFP. Parallèlament, l'ancian centre dels impòstes d'Aiacciu patiguèt una explosion a 23h40. E en Nauta Corsega, cinc lotiments en bastison foguèron atacats dins las localitats de Lucciana, de Erbalonga e de Santa Lucia di Moriani. L'FLNC a revendicat los atacs.

Dempuèi près de dos ans, en Corsega los atacs de residéncias segondàrias an crescut considerablament, revendicats per de movements corsistas. Segon una font judiciària mençonada per Le Monde, lo ministèri public antiterrorista de França aviá dobèrtas cinquanta enquistas en agost, restacadas a d'incendis criminals o d'actes de destruccion en Corsega dempuèi la debuta de l'annada. Aquela recrudescéncia s'ajusta a un nombre creissent d'incidents dempuèi 2020, que meton en lum la persisténcia d'aquela problematica dins la region.

De remembrar que las revendicacions basicas dels còrses son tres: la reconeissença de la lenga còrsa coma egala del francés, l’amnestia pels presonièrs politics, un estatut especial de residéncia per que Corsega pòsca frenar la crompa d’ostals pels estrangièrs qu’i venon sonque passar l’estiu.

De nouvelles explosions dans la nuit fait monter le nombre d'attentats et de tentatives d'attentats en Corse à au moins 18. Ce chiffre pourrait être amené à évoluer à nouveau ⬇️ https://t.co/yF10OJQwe1

— Corse-Matin (@Corse_Matin) October 9, 2023