Qu’es l’Hamas e perqué a atacat Israèl ara? La jornalista Nina Masih a publicada son analisi dins lo Washington Post, que tanben podètz legir en catalan sus Vilaweb.

Lo conflicte palestinoisraelian es tant ancian coma l’estat d’Israèl e la violéncia es tostemps presenta. Mas dissabte los eveniments faguèron una revirada inesperada e ara la situacion es d’una violéncia extrèma e, sustot, d’una egalitat de fòrças entre los dos camps que s’èra pas jamai vista. Es dins aquel contèxt que la jornalista estatsunidenca presenta son analisi.

L’Hamas, o Movement de Resisténcia Islamica, es una organizacion militara que govèrna la Lista de Gaza, un enclavament densament poblat de mai de 2,1 milions de personas. L’Hamàs apareguèt coma una branca dels Fraires Musulmans pendent la primièra intifada palestiniana, o susmauta, en 1987 contra l’ocupacion israeliana de Gaza e Cisjordania. Foguèt fondat pel sheic Ahmed Yassin, un prèire palestinian. Sa branca militara son las Brigadas Izzedine Al Qassam, que s'establiguèron cap al 1991.

Hamas a agarrit mai d’un còp Israèl amb de fusadas e de mortièrs dempuèi sa victòria a las eleccions legislativas de 2006. Israèl i a totjorn respondut amb una poténcia de fuòc superiora e un blocatge punitiu, qu’a fach venir impossiblas las condicions de vida en Gaza. Dins un gèst dramatic, Israèl a impausat ara un sètge total a l'enclavament, en copant los aprovesiments essencials coma l'electricitat, l’aiga, los aliments e lo carburant.

Lo conflicte es lo resultat d’un mes d’agravacion de las tensions restacadas a la mosqueta d’Al Aqsa a Jerusalèm, al blocatge punitiu e a l'ocupacion dels palestinians. La preséncia de supremacistas josieus e de colons dins lo govèrn israelian a mes d’òli sul fuòc. La situacion atenguèt lo ponch de bolh en mai de 2021 après los projèctes d'expulsion de familhas palestinianas de Jerusalèm Èst, e la responsa de l’Hamàs amb de lançaments de fusadas.

Lo conflicte a ara presa una virada perilhosa: Hamas a mostrada una fòrça inesperada e l’Hezbollà, grop politic e armat en Liban, a declarada sa solidaritat amb l’Hamas en lançant d'atacs contra de butas israelianas. Tot aquò nos dona lo chepic d’un conflicte regional mai larg. Los Estats Units son a mandar d’armas a Israèl.

Segon Masoh, l’Hamàs vòl tanplan mandar un messatge a Israèl: que lo grop es pas desfach malgrat las tensions intèrnas e extèrnas que patís e qu’es una fòrça que deurà èsser presenta en quina negociacion que siá.