Lo Conselh d'Estat francés emetèt dimècres passat una ordenança que prescriu al Ministèri de l'Interior de rendre efectiu lo pòrt obligatòri e vesidor del Referencial de las Identitats e de l’Organizacion (RIO), pels membres de las fòrças de l'òrdre en intervencion. La pus nauta juridiccion administrativa a estimat que las mesuras actualas garentisson pas la legibilitat sufisenta del RIO pel public, çò rapòrta Le Monde.

Aquela decision es la seguida d’una sasina del Conselh d'Estat per mai d’una organizacion, dont la Liga dels Dreches de l'Òme, l'associacion Accion dels Crestians per l'Abolicion de la Tortura, lo Sindicat de la Magistratura e lo Sindicat dels Avocats de França. Aquelas organizacions estimavan que l'obligacion del pòrt del numèro d'identificacion individual èra pas respectada de faiçon adeqüata pels policièrs e gendarmas.

Lo Conselh d'Estat a acordat un relambi de dotze meses al Ministèri de l'Interior per prene las mesuras necessàrias per tal de melhorar la visibilitat de la matricula d'identificacion, sustot pendent las intervencions dins d'amassadas o atropaments, quitament quand los esquipaments de proteccion individuala recobrisson l'emplaçament abitual del numèro d'identificacion.

Dempuèi lo 1r de genièr de 2014, las fòrças de l'òrdre an l’obligacion de portar lo RIO, un numèro de sèt chifras, pendent las operacions de mantenement de l'òrdre. Pasmens, sa talha actuala e sa disposicion sus la tenguda dificultan sa legibilitat, çò que mena d’agents a lo portar pas o a lo dissimular.