Actualitats
França e Alemanha enebisson las manifestacions pròpalestinianas
Se multiplica los senhalaments per provocacions a la discriminacion raciala, etnica o religiosa
Tèxte legit
Dins l’encastre de la guèrra a l’Orient Mejan, d’exprimir la solidaritat amb lo pòble palestinian es de mai en mai censurat e enebit dins qualques païses europèus. En Alemanha e França, an enebidas de manifestacions que cercavan de condemnar la responsa militara de l’estat d’Israèl als atacs de l’Hamas e qu’an portat un infèrn dins la Lista de Gaza amb de milièrs de civils tuats e un blocatge total sens aiga ni electricitat. Lo drech fondamental a la protèsta pacifica, protegit per de resolucions del Parlament Europèu, es questionat dins aqueles païses.
De manifestacions enebidas a Berlin
A Berlin, la polícia proïbiguèt doas manifestacions en sosten a Palestina programadas per dimècres, en invocant de possiblas menaças a la seguretat e a l'òrdre public, fondadas sus d'eveniments recents de concentracions espontanèas en favor del pòble palestinian.
França: enebicion de “totas las manifestacions pròpalestinianas”
En França, lo ministre de l’Interior, Gérald Darmanin demanda l’interdiccion de “totas las manifestacions pròpalestinianas”, dins un messatge adreiçat als prefèctes, çò rapòrta Le Monde. Las autoritats crenhon mai que jamai l'emergéncia de tensions ligadas al conflicte.
Una manifestacion a Lion que cercava de protestar contra lo secutament del pòble palestinian foguèt tanben interdicha, e la policia dispersèt los manifestants en utilizant de matracas. A París an multadas 24 personas e n’an arrestadas 10 per lor participacion a una accion de sosten a Palestina. De fach, lo govèrn francés a desplegat un grand nombre de fòrças de l’òrdre per protegir sinagògas e centres educatius josius a causa d'un aument de menaças e d’accions antisemitas darrièrament.
En cinc jorns, la plataforma Pharos a constatada de quatre parts una dels senhalaments per provocacions a la discriminacion raciala, etnica o religiosa enregistrats per l'ensems de l’an 2022.
Reialme Unit: se vòl considerar coma un acte terrorista lo fach de brandar un drapèl de Palestina
Dins lo Reialme Unit, e mai se siá menat a bon tèrme de manifestacions de supòrt a Palestina, la ministra de l'Interior, Suella Braverman, a demandat a la polícia d’avalorar se lo fach de brandar un drapèl palestinian pòt èsser considerat coma un delicte d'òrdre public fe glorificacion d'actes de terrorisme. Aquò a generats de debats sus l'interpretacion del drech a la libertat d'expression dins lo contèxt d'aqueste conflicte.
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
França e Alemanha enebisson las manifestacions propalestinianas, mas non las manifestacions proisrealianas ? E aqueste inequitat non es racista ? Secutar de Josieus es un crime, mas secutar de Palestinians non o es pas ? Sosténer l'idèa d'un estat palestinian es colpable, mas sosténer lo fait impausat per la fòrça, la persecussion e la violéncia, d'un estat israelian sempre mai espandit dins sas colonias non es pas colpable ? Brandir un drapèl palestinian es una incitacion al terrorisme, mas brandir un drapèl israelian, estat que terroriza de contunh los Palestinians, non o es pas ? Aquò non me sembla plan clar, al plan de las idèas.
E puèi, se començan en Euròpa de criminalizar lo pòrt d'un drapèl palestinian, qué finirà per arribar a los que brandisson drapèls basques, còrses, bretons, escosseses o irlandeses ? E quid dels drapèls catalans o occitans ? Aqueste conflicte israelopalestinan nos va menar pèrdre encara mai libertats que lo pauc que ne nos daissavan. E a cada novèl edicte de reglamentacion de l'opinion en public, marcham sempre mai luènh a dreita (extrèma), coma s'aquò foguèsse normal, sense reagir mai, sense s'indignar mai…
Un pòble que ne secuta un autre, que siá fisicament e/o moralament, foncciona d'un biais inadmissible. Los estats d'Euròpa criminalizan lo fait d'o exprimir…
Inadmissible es de secutar de Josieus. Indamissible es de secutar de Palestians. Ont es lo crime d'o denonciar, d'o manifestar ?
Devèm demorar liures de non o admetre tant coma d'o dire, en public tant coma en privat, me sembla. Aquò procedís de la postura democratica mai elementària. Las reglamentacions aicí impausadas unilateralement, sense dire que son plan manifèstament inequitablas, trepejan nòstras libertats d'opinion e d'expression, amb o sense Orient Mejan. E sus aqueste punt de fonccionament europèu, los integristas religioses, per tant abrutits e salvatges que sián, an l'esquina larga : despuèi mai de quinze ans, tot fa ventre per restrénher sempre mai las libertats d'opinion e d'expression, e per apringondir sempre mai la susvelhança generalizada de las populacions. A ieu, me dona lo sentiment que l'orizont dels ministèris de l'interior europèus se son causida la soleta China contemporanèa per orizont "pragmatic". Del mai ven insofrible un sistèmi economic dessenat e injust, e del mai cal fòrça, interdiccions, contròtles e repression per o manténer, ni mai, ni mens, amb o sense Hamas maselador, amb o sense ultradreita israeliana secutadoira.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari