Segon nòstres confraires de 20 Minutes, Provença Torisme a dreiçat un primièr bilanç de la sason toristica a Marselha e dins sa metropòli. Pr’amor del trauc d’aire de julhet e d’un còr de sason relativament solombrós, l’annada s’anóncia encara excellenta. Resultat: una tendéncia que s’afirma an après an e qu’encanta los actors; una exposicion de la preséncia dels toristas de mai en mai importanta sus tota l’annada.

“Siam ajudats per lo desreglament climatic”, çò obsèrva amb una satisfaccion retenguda Danielle Milon, la presidenta de Provença Torisme. Ajudada dins lo grasal d’un “torisme de quatre sasons” mirat per totes los actors del sector. “Aquela annada es una virada”, çò a quitament afirmat la presidenta, qu’es tanben consolessa màger de Cassís, polida comuna balneària que se trapa delà las calancas de Marselha.

Perque pr’amor d’un moment de crisi en julhet, ligat, segon l’organisme de pilotatge del torisme, als títols de premsa sul calimàs e a las susmautas, “s’agacham de genier a octòbre, avèm encara progressat”, çò nòta Danielle Milon, qu’ajusta: “lèu farem aquelei bilanç en novembre”, tant l’estiu indian s’espandís d’ara enlà.

Dins lo detalh, la frequentacion del “còr de sason estivala”, valent a dire julhet-agost, a reculat d’un 4 % a respècte de 2022, an de totes los recòrds. Mas aquela tendéncia d’aver de meses de julhet en mièjas tenchas ven pas de ièr. “Es quauqua ren que s’es installat au fieu deis ans. Sovent en julhet e avost lei seuvas e lei calancas son barradas au public [per prevenir los risques d’incendis].”

Ongan, l’avantsason es estada “fantastica”. E la rèiresason, portada per la Copa del Mond de rugbi e la venguda del papa Francés, es parièra.

A aquel prepaus, Provença Torisme a agut lo retorn de las chifras ligadas a aqueles dos eveniments. Aital, la dimenjada del 8 al 10 de setembre ont se tenián doas partidas de la Copa del Mond de rugbi (Anglatèrra-Argentina e Africa del Sud- Escòcia), son 28 000 nuèches de mai en locacions sasonièras (fòra ostalariá) que son estadas comptabilizadas. Dins l’ensems, la frequentacion toristica per aquela dimenjada foguèt superiora del 20 % a la del 13 d’agost, pic de la sason estivala.

Totparièr, los 21, 22 e 23 de setembre, jorns de la venguda conjugada a Marselha del papa Francés e de l’esquipa de França de rugbi per afrontar Namibia al Velodròm, las nuechadas toristicas reservadas per de franceses bombiguèron d’un 41 % a respècte de la meteissa data d’arunan.

Mas dins aquel tablèu dels lums totes al verd, demòra un bemòl: “La baissa dau poder de crompa e l’inflacion aguèron de repercussions fòrça importantas sus la restauracion”. Lo 46% dels restauraires estiman la sason marrida, segon un sondatge comandat per Provença Torisme, del temps que l’85 % de l’ensems dels professionals an jutjat la frequentacion bona. Demòra de veire se l’efièch “quatre sasons” pòt profechar als restauraires, subretot pel torisme de Nadal, d’ara enlà dins la mira de l’agéncia de promocion del territòri, a l’entorn d’un triptic identitari grépia, santons, petanca.

En 2022, 8 milions de toristas foguèron recensats dins la metropòli. Marselha capta ela sola entre lo 30 e lo 35 % d’aquela manna.

Ràdio Occitània