67 inuits groenlandesas reclaman a l’estat danés una compensacion economica per las violéncias e sequèlas de la campanha coneguda en Danemarc coma spiralsagen: un plan de contracepcion forçada e non informada contra, presumidament, 4500 femnas, que l’estat desvolopèt dins l’illa artica pendent los ans 1960 e 1970. Las 67 femnas refusan d’esperar las conclusions d’una actuala enquista governamentala, previstas per 2025.

Aquel capítol de l'istòria de Groenlàndia foguèt largament difusat en 2022, a travèrs d’un podcast de la radiotelevision publica danesa. L’estat danés impausèt un programa de contraròtle de la natalitat, en fòrça cases sens informacion adeqüata, a environ 4500 femnas inuits groenlandesas —qualques unas quitament menors—, que subiguèron l’insercion de dispositius intrauterins (DIU). Aquela chifa equival, aperaquí, a la mitat de las femnas inuits groenlandesas en edat de procrear a aquela epòca.

Abans la publicacion del podcast, una de las victimas, Naja Lyberth, aviá ja parlat publicament d’aquelas violéncias en 2017. Lyberth explica que l’introduccion dels DIU provoquèt ulteriorament de dolors a fòrça femnas, de sagnadas e d'infeccions. En qualques cases extrèms, çò explica, las complicacions derivadas d’un seguiment medical inadeqüat provoquèron l’extirpacion de l’utèr en qualques victimas.

La tòca del govèrn danés foguèt de demesir la taxa de naissenças en Groenlàndia, çò que capitèt efectivament en pauques ans.

Las 67 femnas reclaman una compensacion de 300 000 coronas danesas  (unes 40 000 èuros) per caduna, e la reconeissença oficiala dels damatges que lor foguèron infligits. Se Danemarc refusa de lor autrejar pas las compensacions, las femnas se resèrvan la possibilitat de denonciar l’estat.

Aquesta nòva es adaptada de Nationalia amb qui Jornalet ten un acòrdi de cooperacion.