Era Val d’Aran qu’acuèlh aué era 20u edicion dera Corsa Aran per sa lengua. S’agís d’ua manifestacion revendicatiua ena que fòrça aranesi trauèrsen era Val, a pè o en tot córrer. Es corsaires que gessen de Les, de Montgarri o deth Pòrt de Vielha e que s’amassen ath ser ena plaça de Vielha. Aquiu que se i amassen normauments ues 1000 persones, e dempús des actes e des discorsi, un brave e animat concèrt de Nadau que claue ua jornada que cada an ven istorica.

Es activitats que comencèren agèr damb activitats entara mainadèra e teatre. Aué tot eth país aranés marche des tres punts dera Val entà trapar-se ena plaça de Vielha. Aquiu qu’arribaràn en tot carrejar es terçons, que permeteràn de diboishar eth mapa dera Val ena plaça dera glèisa.
 
Era marcha qu’ei organizada peth collectiu Lengua Viua, entà revendicar er usatge sociau der aranés.
 
Era principau hònt de sòs entà finançar er eveniment, qu’ei era venta dera camiseta dera corsa, qu’ena edicion d’enguan ei dissenhada peth joen aranés Pep Casasayas. Eth dessenh de Casasayas que remèrque es 20 ans dera corsa, damb eth numèro 20 a faiçon de dorsau ena part davantèra dera camiseta. Ena part de darrèr, ua crotz occitana ges d’ues montanhes coma se siguesse eth solei “entà presentar com d’entre es montanhes arribam tà toti es lòcs” çò diguèc Casasayas ara redaccion de Jornalet. “Totun, çò de mès d’important ei remercar es 20 ans dera corsa”, çò ahigèc.
 
Era corsa que compde cada an damb mès compatriòtes de Garona enjós, que vien tanplan a botjar-se peth nòste aranés, qu’ei, fin finau, er occitan de toti.
 
 
 
 
Ferriòl Macip