Lo ministre delegat als transpòrts, Clément Beaune, a reafirmat la perseguida del projècte d'autoestrada A69 entre Tolosa e Castras. Aquela declaracion es estada seguida d'una represa rapida de las òbras, marcada per una operacion simbolica, lo deslotjament dels militants que protegissián quatre platanas menaçadas pel projècte e l’abracada de qualques arbres, çò rapòrta Reporterre.

Diluns passat, 16 d'octobre, de desenas de veïculs de gendarmariá se gandiguèron a la zòna d'activitats de la Prada, a Soal (Lauragués) per deslotjar los militants escaissats “esquiròls”, qu'ocupavan dempuèi quaranta cinc jorns aquelas platanas menaçadas.

Lo deslotjament se faguèt mentre que s’èran establits de ponches de contraròtle sus de nombroses giratòris a près de 40 quilomètres del sit per evitar qu’om poguèsse manifestar lo sosten als “esquiròls”. Las escènas d’aquel deslotjament e de l’arrestacion dels militants que las descriu Reporterre son “terriblas”.

Tot aquò aguèt luòc a qualques jorns d'una granda mobilizacion prevista los 21 e 22 d'octòbre, ont de milièrs d'opausants a l'A69 an previst de desfilar entre Tolosa e la sosprefectura de Tarn.