Arunan, la primièra ministra escocesa d’alara, Nicola Sturgeon, anoncièt un referendum d'independéncia pel 19 d'octòbre de 2023. Pasmens, la Cort Suprèma britanica estimèt que lo parlament escocés podiá pas convocar aquela consulta populara sens lo consentiment del govèrn britanic. Un an apuèi, lo Partit Nacional Escocés (SNP) a anonciat una nòva estrategia per aténher l'independéncia, dins un encastre politic complèxe. Après las recentas deliberacions a la conferéncia annadièra de l’SNP a Aberdeen, s'es dessenhat lo camin per avançar cap a aquel objectiu.

L’actual primièr ministre, Humza Yousaf,  prepausa una estrategia diferenta de Sturgeon. Sa tòca es de cercar una draia legalament segura per aténher l'independéncia amb una majoritat indiscutibla. Aquel apròchi pòt durar d’annadas.

La conferéncia de l’SNP a establits mai d’un pas per pervenir a l'independéncia. Aquò compren l'organizacion d'una nòva campanha sus la sortida del Reialme Unit, la creacion d'una majoritat independentista a las eleccions britanicas venentas e, en cas de reüssida, l’entamenada de negociacions amb lo govèrn britanic.

En cas qu'aquelas negociacions capitèsson mal, se considerariá la creacion d'una convencion constitucionala qu’implicariá de deputats escoceses del parlament britanic, de deputats del parlament escocés e de representants de la societat civila. Aquela convencion establiriá los tèrmes detalhats per l'independéncia e poiriá alestir lo terren per l'integracion d'Escòcia dins la comunautat internacionala e l'Union Europèa.