Lo grop gascon de l’associacion  Memòria en Maransin, au torn deu Pèire Laforie e deu Felip Dubedout, que s’amassa dempuish annadas a Linça (Lanas) tà parlar, escambiar, se soviéner, batalar, léger, comentar e escríver. Que cau donc saludar la parucion d’un recuelh Peus camins deu Maransin tot just sortit deu talhèr de l’estampaire. Que son petitas hèitas contadas preu Pèire Laforie e adobadas dab l’ajuda eficaça deus ahuecats deu nòste  “parlar néguer”, aqueth biaish de prononciar lo gascon dens los parçans de la còsta atlantica, de Sanguinet estant (País de Bòrn) dinc a Baiona. 

Las uas que pintran personatges qui semblan tot dret sortits d’ua carta postau de l’Émile Vignes (1896-1983), lo gran fotograf de Castèths (Maransin) qui contribuí a har conéisher la  “Còsta d’Argent”. Las autas que son devudas a las escadudas de l’istòria com aquestes estranhs sikhs e georgians arribats dab l’armada alemanda d’ocupacion en 1942-43. Que gostan hòrt, tanben, la passejada poetica d’un chòt d’aiga en Maransin: qu’arriba au miei de milèrs d’autas perlinas doças e frescas dens l’arrós deu matin, que manca d’estar esglaishada per l’enòrma arròda d’ua carreta traversant l’arriu au guà deu Pas deu Car, qu’enten aqueras clacassèras lavadoras de Linça har la bugada a la lor mòda, e qu’acompanha bèths sénhers e bèras daunas hasent la promenada, a la Bèra Epòca de la Còsta d’Argent, sus un galaup deu corrent d’Uishet... Qu’admiran la sensibilitat e l’umor de l’autor quan parla deus “comgets pagats” de 1937 qui van passar ua bona jornada de plaser en descobrir la Mar Grana, a còps preu permèir còp.
 
Granmercés a l’amic Pèire de’ns contar tan bravas benalejas deus bròis vilatges maransinòts on sabèvan s’esclaquerar a maugrat deus temps escurs de la guèrra.  “Lo marcat néguer deu Jausèp” (1943) e autas  “colhonadas” son aquí tà nos balhar l’arríder aus pòts.
 


 
Joan Jacme Fénié
 


_____
Contacte: P. Laforie, 127, Carrèra de las Cigalas, 40560 Viela Sent Gironç, +33 (0)5 58 47 94 25.