Es al castèl de Comarca, en Peiregòrd Negre, que lo realizaire Steeve Calvo e son esquipa se son arrestats per una nuèch, lo temps de rodar las darrièras scènas de La Masca, çò rapòrta Sud-Ouest.

“Es l’istòria d’una jove qu’assistís a la caça de las mascas”, çò detalha Shu Aiello, la directritz de produccion. “Es perseguida e salvada per una autentica masca. Quand aquesta se morís, pren sa plaça”, çò apond en tot precisar qu’es un format cort: “lo film va pas despassar dètz e uèch minutas. Es destinat a èsser presentat dins de festenals.”

Rodat en partida a Doma, a Comarca e dins de bòsques de Peiregòrd, aquel cortmetratge, entitolat La Masca, deuriá sortir pendent lo primièr trimèstre de 2024.

La particularitat d’aquela istòria es qu’es rodada en occitan e en Peiregòrd: “Per son istòria e sos decòrs, lo territòri se prèsta plan a aquel genre de filmes, çò assegura Shu Aiello. E anam pas amagar que la region e lo departament nos an fòrça ajudats.”

Un territòri ideal pel cinèma

La lenga serà l’occitan lemosin. “Perque las sonoritats son mai escuras”, çò explica lo realizaire. Un especialista de la lenga es present per aprene a parlar als comedians. S’agís de Laurenç Labadie, que ten un pichon ròtle dins lo filme.

L’actritz qu’encarna la Masca, la vièlha masca, es, ela, de Peireguers. S’agís d’Emília Esquerré. Pertocant l’esquipa de filmatge, es majoritàriament peiregòrda. “Es un gròs avantatge, çò reconeis la directritz de produccion. Aicí, s’a çò que cal en tèrmes umans per trabalhar.”