Letònia a ordenat lo fòrabandiment dels residents russofòns qu’an refusat d’aprene lo leton. La mesura afècta environ 180 000 estatjants, çò es lo 10% de la populacion. Lo govèrn rus a exprimit son chepic per aquela situacion e a ofèrta son assisténcia als ciutadans expulsables. Jutjan que las requeréncias lingüisticas son tròp estrictas e fan apèl a las agéncias especializadas de l’ÒNU e de l’ÒSCE.

En Letònia, aperaquí lo 63% dels residents s'identifican coma etnicament letons, del temps que lo 24% son etnicament russes, çò es environ 450 000 personas. La majoritat d'aqueles russes an plan capitadas las espròvas de ciutadanatge, dont un examen de lenga, e son de ciutadans letons de plen drech.

Après l’independéncia, en 1991, d’aquel pichon estat d’1,8 milion d’abitants, Letònia definiguèt un estatut de ciutadanatge particular: totes los qu’i demoravan dempuèi abans 1940 venián ciutadans letons mas los autres residents non. Aquò afectèt mai que mai los russes, qu’èran lo 34% de la populacion a aquel moment. Per obténer lo ciutadanatge, se requerís de residir dins lo país pendent almens cinc ans, de reüssir un examen de lenga letona equivalent al nivèl B1 e de demostrar de coneissenças sus l'istòria, la cultura, l'imne e la Constitucion del país.

A causa d'aquela politica, aperaquí lo 10% de la populacion actuala de Letònia, environ 180 000 residents, son dins la categoria dels non-ciutadans; aqueles non-ciutadans an pas lo ciutadanatge mas si qu’an qualques dreches coma l'emission d'un passapòrt especial. Mas, dempuèi la guèrra d’Ucraïna, Letònia a volgut reduire l’influéncia russa en retirar de monuments sovietics, en enebir la television russa e en eliminar las escòlas russofònas. Ara se prepausa d’expulsar aqueles ciutadans russofòns qu’an pas aquist lo ciutadanatge d’aquel país baltic.

E mai lo 25% de la populacion se considère etnicament russa, lo rus es la lenga mairala del 37% dels letons e, fa gaire, lo rus encara èra una lenga d’usatge social normal.