Longtemps, la Carrièra del Taur de Tolosa es estada lo luòc de passatge dominical de mai d’un tolosan. Partissián de la Plaça del Capitòli per rejónher la de Sant Sernin pel rendètz-vos bèl del dimenge de matin. E non, parli pas de “la messa” en la Basilica que trona al mièg de la plaça, mas de “l’Inquet”, lo famós mercat al fèrre vièlh.

Pasmens, en seguida de las òbras de renovacion de la plaça, lo mercat mudèt. En mai, lo barrament d’un molon de comèrcis sul naut de la carrièra, fa que toristas tant coma passejaires, passan per l’artèria del còr mondin sens flandrinejar o s’arrestar.

Fòrt aürosament, una chorma d’irreductibles creators, amb la complicitat de l’Associacion dels Comerçants e Artisans de la Carrièra e lo sosten de la comuna de Tolosa, an decidit de faire tornar viure lo cap de lor carrièra en tot fargant un mercat de creators original e local dos divendres per mes. Son nom: los Créas’Taur.

Pichona presentacion

Un divendres d’aprèp-miègjorn coma los autres Carrièra del Taur.

O pas…D’efièch, al canton de la Carrièra de Peiregòrd, lo portal gigant del CROS, la cinematèca e la cava poesia René Gouzenne, un dotzenat de creators s’afanan a l’entorn de lors taulièrs.

Forra-borra, s’i trapa de pinturas e d’illustracions, de joièls, de vestits, de ceramica, del veire filat e un molon d’autras meravilhosas meravilhas…

Lo ponch comun de totas aquelas creacions: son localas, artisanalas, plan sovent unicas e presentadas per lors creators eles meteisses, amassats a l’entorn d’un rendètz-vos vengut familiar als mondins: los Créas’Taur.

E d’autre caire, nombroses son los passants, vesins que tornan del burèu o van cercar los mainatges a l’escòla, o de toristas venguts assistir a la Copa del Mond de rugbi, que flandrinejan, s’arrèstan e tornan partir en possession d’una remembrança unica de la Ciutat Ròsa.

Qu’es aquò, Les Créas’Taur?

Quand pausatz la question a Franck, aliàs lo Frangotier, lo que se presenta coma “artisan blagouniste” vos va respondre dins un amusant “Alara, es un mercat de creators, Carrièra del Taur”. Mai seriosament, nos explica que l’iniciativa es nascuda de l’idèa de “tornar animar la Carrièra del Taur”.

De fach, se la carrièra del Taur (que deu son nom al primièr evesque de Tolosa, Sant Sernin, que, segon la legenda i auriá perit aprèp èsser estat estacat a un taur salvatge), n’es pas a l’estadi del martiri, coneis dempuèi qualques annadas “una cèrta lassièra e una baissa de frequentacion”.

D’efièch, lInquet dominical de Sant Sernin mudèt e d’unes comèrcis son estats remplaçats pauc a cha pauc per d’establiments de restauracion d’emportar. A mai, qualques ans fa, l’Esquile, l’estanquet del barri, que Franck qualifica de “ponch d’aiga del quartièr, ont se venián recampar totes los ribairencs”, barrèt.

Alavetz, caliá far quicòm per tornar un pauc de son ambient popular a aquela carrièra del còr de Tolosa.

Un projècte nascut d’una iniciativa populara

Atal, après qualques amassadas intèrnas, mas tanben amb los servicis tecnics municipals, l’Associacion dels Comerçants e Artisans de la Carrièra del Taur prenguèt una decision. La de balhar lo cap de la carrièra a l’associacion Bonito Tolosa Produccions dos divendres per mes, per tal de poder prepausar un mercat portat per creatrises e creators: los Créas’Taur eran a mand de nàisser.

A mai, lo mercat contunha d’estrambordar los comerçants del barri: “Los que son mai naut dins la carrièra parlan de nosautres a lors clients, prenon nòstras afichas e nòstres flyers”, çò nos explica Franck, abanç d’apondre: “Las estructuras culturalas de la carrièra, sustot la cava poesia René Gouzenne e la cinematèca de Tolosa nos fan un plan bon acuèlh tanben”. E del costat del Capitòli, s’aculhís tanben d’un plan bon uèlh aquela iniciativa. Atal, la Comuna de Tolosa es partenària del mercat los Créas’Taur.

E la bona umor e la convivialitat del mercat fan despassar las divisions politicas. Atal, es pas rar, entre los taulièrs del mercat, de crosar d’elegits de mai d’una tendéncia politica: d’Antoine Maurice, elegit d’Archipèla Ciutadan (oposicion) fins a Julie Escudier (majoritat municipala), capitolessa màger del quartièr.

Lo fach-man e lo local al centre del projècte

Lo mercat dels Créas’Taur ten a còr de botar endavant las creatrises e creators locals. Aicí, pas de produches crompats sul malhum e revenduts amb un marge. Es la persona que veiretz darrièr lo taulièr qu’a fabricat de sas pròprias mans las creacions mostradas.

Atal, ne poiretz tanben profechar per aprene coma son estats concebuts los objectes. Quitament, descobrir un molon de causas que sabiatz pas benlèu, sus de subjèctes coma la fabricacion de joièls, lo reciclatge d’ancians objèctes per ne fargar de novèls, la litoterapia o sapiéncia de las pèiras, la ceramica, lo veire filat e totplen d’autras causas.

Perque es tanben aquò, los Créas’Taur: un ambient convivial ont los escambis e lo sorrire s’encontran dels dos costats dels taulièrs. Los expausaires s’entrajudan, badinan entre eles e comunican la bona umor als passants.

Lo mercat es dobèrt a totas e totes, tant professionals coma “artisans amators”. La sola constrencha es l’espaci reduch, que permet pas de plaçar qu’un desenat de taulièrs… E tanben, o confessam, de còps son los tempèris que pausan de problèmas. Perque coma sus tot mercat de plen aire: “the sky is the limit”.

La plaça de l’occitan dins lo mercat

Se per ara lo mercat ten pas cap de taulièrs de creator o creatritz occitanofòna (cal dire lo mai bèl artisan/creator occitan de Tolosa, Macarèl, ten botiga un pauc mai bas dins la carrièra), lo collectiu es completament dobèrt a l’idèa d’aculhir tant d’artisans “de lenga nòstra” coma d’artistas occitans. Perque òc, dins lo mercat dels Créas’Taur, la musica ten tanben una plaça de las bèlas.

La jornada s’acaba en musica

La musica de carrièra a Tolosa fa tant partida del patrimòni coma la brica ròsa. Atal, un fum d’artistas de la mena dels Fabulous Trobadors, Nicolas Bacchus, Femmouzes T. e un molon d’autres an començat lor carrièra musicala a Tolosa…Ben justament, “per carrièras”.

Fidèls a aquela tradicion (cal dire que la promocion de la musica tolosana es una autra de las missions que s’es balhada l’associacion Bonito Tolosa), los Créas’Taur vos prepausan a comptar de 6 oras del vèspre un pichon moment musical e festiu en acostica.

Alavetz, nos tornam trapar en Carrièra del Taur lo divendres venent ont los Créas’Taur i tendràn mercat? Ieu, de tot biais, i anirai de ben segur.

Rendètz-vos venents amb los Créas’Taur: los Divendres 27 d’octòbre, 10 de novembre e 24 de novembre de 14h a 20h… Carrièra del Taur, plan solide.