Se multiplica per tota la planeta de manifestacions de sosten al pòble palestinian e per la patz en Gaza, malgrat las enebicions de qualques autoritats. Aital, dissabte a Nimes, en despièch de l’interdiccion, una quinzena de personas se recampèron del temps qu’a Montpelhièr la manifestacion èra fòrça nombrosa, çò rapòrta France 3. Aqueste recampament foguèt autorizat malgrat una enebicion iniciala del prefècte del departament, gràcias a un recors depausat al tribunal administratiu de Montpelhièr que permetèt una manifestacion estatica sul Plan Cabanas. La manifestacion foguèt convocada per gaireben una vintena d’associacions e de partits politics per sosténer lo pòble palestinian.

Totun, a París, la situacion foguèt plan desparièra. De milièrs de personas manifestèron pel pòble palestinian malgrat l’interdiccion. Segon la polícia parisenca, i participèron entre tres e quatre mila personas dont qualques centenats foguèron verbalizats e deuràn pagar de multas, çò rapòrta Le Monde.

De soslinhar que lo Conselh d'Estat aviá refusat un recors contra la proībicion de las manifestacions pròpalestinianas.

Rassemblement en soutien au peuple palestinien à #Montpellierpic.twitter.com/SAmvFJoKhJ

— Cécile Hautefeuille (@CecHautefeuille) October 28, 2023