Dumpuèi dus ans ara, lo licèu de l’Isla de Baish e lo licèu Xifra i Masmitjà de Girona hèn un escambi occitanocatalan en familha. Es a díser que, deu 16 au 20 d’octobre, escolans d’occitan recebón dins la lor familha correspondents catalans. Deu 21 au 26 d’abriu 2024, seràn los joens lisleses qu’angueràn dins familhas gironinas. Aqueste viatge estoc organizat per Nicolau Rei Bèthvéder e Eric Barta, deu costat occitan, e per Marta Pasqual e Júlia Monte, deu costat deu Principat. L’idèa, au delà deu castelhan e francés que tots estúdian, es de crear vertadèras amistats entre aquestes 18 joens.

Aqueste escambi, que remonta a 2000, permet aus nòste liceans de véser los ligams pregonds qu’existishen entre aquestas duas lengas sòrs. Bastir Euròpa comença per comprénguer que los nòstes vesins son frairs.

Au delà de la participacion deus gironins aus corses deu licèu Josep Savèrna de l’Isla de Baish, lo 18 d’octobre, estoc lo parat de visitar lo país. Los catalans visitèn Tolosa e la sua hala de las maquinas, e prengón lo navèth teleferic. Visitèn tanben Condom, l’ostau aquitanoroman de Seviac, lo vilatge medievau de Larresingla. Hascón ua bèra passejada suu camin de Sent Jacme peus costalats d’Armanhac. Un deus moments hòrts estoc la visita de la vila bessoada damb Girona, Albi. Gràcias a Eric Barta e aus sons liceans descobrín en occitan lo musèu Tolosa-Lautrec e la catedrala albigesa. Estoc tanben lo parat de mostrar que l’occitan dins l’ensenhament catolic es vitèc, quan pensèc desaparéisher enguan.

Tot aquò èra dins l’encastre d’Erasmus+, volut per Euròpa, e aqueste escambi occitanocatalan èra ua part de la grana setmana internacionau qu’organizèc lo licèu Josèp Savèrna en tot recéber tanben lituanians e galècs. Au totau, 40 escolans son concernits. Tots prengón consciéncia de la diversitat lingüistica d’Euròpa, mès tanben de la sua fragilitat.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…