Mentre que lo retard de las òbras de reconstruccion en Vesubiá encolerís los estatjants, una nòta intèrna de la metropòli Niça-Còsta d’Azur poiriá balhar una justificacion de mai.

Perqué, tres ans après la tempèsta Alex, las òbras de reconstruccion an pas avançat aitant coma aurián degut dins lo departament dels Alps Maritims? Amb d’obratges totjorn temporaris e cèrts obradors a l’arrèst. O, almens, al relentit.

La question (e la charpinariá) tornèt sus totes los pòts la setmana passada dins la val de Vesubiá tornarmai tocada per de tempèris. La metropòli Niça-Còsta d’Azur evòca l’enquista en cors per de dobtes de “desviacion de fonzes” e d’unes blocatges reglamentaris qu’un arrestat novèl del prefècte deuriá permetre de levar.

Mas, franc de cèrts crèdits promeses per l’estat, se la collectivitat, que ja raseja lo plafon d’endeutament, auriá ela meteissa decidit d’alentir la cadéncia per far pression al mai naut nivèl?

Es, cossí que siá, çò que poiriá daissar pensar un document intèrne, revelat lo 26 d’octòbre per Mediapart, que reprodutz una nòta datada del 22 de setembre de 2022 e atribuida al “comitat de direccion generala de la metropòli”. Fariá lo compte rendut d’un “acamp cònsol màger/prefècte” organizat tres jorns mai d’ora. Un paragraf entitolat “crèdits tempèsta Alex” fa ben estat d’un “blocatge” sus las somas autrejadas per l’estat. Suls 152 milions d’èuros “esperats” per las òbras de reconstruccion dins las vals, i a pas que 42 milions que serián estats “pagats”.

Christian Estrosi auriá alara decidit del “mantenement d’una pression plan fòrta” amb l’“arrèst de totas las òbras” que non “reprendràn [que quand] seràn recebuts los finançaments de l’estat”.

Mentretant, totjorn segon lo document, èra tanben preconizat d’adoptar una “comunicacion positiva […] de cap als elegits” dels vilatges, dins las vals concernidas, e de “valorizar” al près d’eles “çò qu’es estat fach”.

Sollicitat per 20 Minutes lo 27 d’octòbre, l’entorn de Christian Estrosi “desnega pas” l’existéncia d’aquela nòta sortida de la direccion generala dels servicis de la metropòli mas assegura n’aver pas agut “ges de coneissença”. Pel demai, lo gabinet del cònsol màger de Niça, president de la metropòli, remanda a las declaracions de l’avocat de la collectivitat, citat dins Mediapart. Se lo ritme de las òbras es ben estat “frenat” (manca de 29 milions d’èuros budgetizats ongan, contra mai de 57 milions en 2022), seriá pr’amor de “l’absurditat del drech aplicable” e de “l’existéncia d’una procedura judiciària”, çò soslinha Me. Olivier Baratelli.

“Me mòstri formal en indicant que las somas engatjadas en 2023 demòstran d’esperelas, e clarament, que cap de decision d’arrèst de las òbras es pas estada considerada o presa”, çò perseguís lo jurista. Un “còp de pression” en direccion de l’estat seriá pasmens l’estrategia adoptada, segon una sorsa de Mediapart pròcha del dorsièr.

Dins un pòst publicat lo 3 d’octòbre, tres ans jorns per jorn après la tempèsta Alex, Emmanuel Macron aviá tengut a recordar que “615 milions d’èuros [èran] estats engatjats per una reconstruccion resilienta e duradissa” de las vals.