Tèxte legit
Aqueste dissabte 4 de novembre, suspresa bèla a Hamilton ont se jogava la finala de la Copa del Pacific entre neozelandeses e australians. La setmana passada, los Cangorós avián emportat la victòria pro aisidament: 36-18. Dos ensages d’alièr permetián als Kiwis de menar 12-0 a la pausa, abans de refortir l’avantatge en marcant 3 ensages de mai dins lo second temps per ganhar: 30-0! Es pas cada jorn que los campions del monde coneisson la desfaita!
A Leeds, Anglatèrra emportava lo tresen tèst fàcia a Tònga mai aisidament que los primièrs dos: 26-4.
Lo XIII femenin anglés a pas cap de mal per batre Galas en marcant 11 ensages: 60-0.
En Africa, se jòga la primièra partida internacionala entre seleccions femeninas del continent: Nigèria bat Ghana: 40-4.
Lo XIII-cadieral ganha a Leeds
L’esquipa de França de XIII-cadieral (a mai se diga ara pararugbi de XIII) anava afrontar los campions del Mond angleses a Leeds: victòria dels Blaus 43-34. Las doas formacions se tornaràn trapar lo dimenge 25 de novembre de vèspre al Palais dels Espòrts de Marselha.
Elèit 1: Los audencs mai fòrts que los catalans
Lo marrit temps faguèt remetre doas partidas sus decisions municipalas: Vilanòva-Avinhon e Limós-Albi.
Dissabte, al Molin, Pià menava a la pausa, mas Lesinhan s’impausa 26-10.
A Domèc, los Dragonets resistisson a Carcassona dins lo primièr temps abans d’encaissar dos ensages suplementaris dels Canaris que ganhan 30-12.
Dins lo dèrbi de Garona, aqueste dimenge, Sent Gaudenç se va impausar a Tolosa: 44-16.
Aquesta fin de setmana, Lesinhan jogarà divendres de ser a Sent Gaudenç en causa de la difusion televisada de la partida sul novèl partenari de la Federacion: NA-Media. Dissabte, Carcassona se desplaçarà a Tolosa e Vilanòva a Albi. Dimenge, Pià reçauprà Limós. Avinhon-Vilanòva completa aqueste programa.
Elèit 2: Vilafranca sus sa lançada
Alara que Tonens e Vilagalhenc-Argon poguèron pas jogar en Òlt e Garona, lo primadièr, Vilafranca de Roergue, se va impausar a Carpentràs: 22-10. Illa fa la diferéncia dins lo segond temps e bat l’Escura: 22-10; primièra victòria de la sason per Entraigas que bat Selon: 26-20.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari