L’Esquèma Estatau de las Infrastructuras de Transpòrts (SNIT segon sa sigla en francés) evita la question dau liam autostradier n°51 (A 51) en la Gavotina entre La Sauça (departament de las Autas Alps) e Lo Monestier de Clarmont (departament d’Isèra).

L’SNIT es una aisina francesa de planificacion de projèctes per l’amainatjament dau territòri. A per objectiu de desvolopar los transpòrts ferroviaris e fluviaus amb quauques sites d’importància aeroportuaris e estradiers. Es concebut per lo Ministèri de l’Ecologia, dau Desvolopament Duraís e de l’Energia menat per Ferric Cuvillier, per l’intermediari de la Direccion Generala de las Infrastructuras, dels Transpòrts e de la Mar. Lo projècte d’SNIT per los 25 ans a venir, avalorat a 245 miliards d’èuros, es revisat per la comission Mobilité 21,  charjaa de triar e ierarquizar las prioritats.
 
Segon Le Dauphiné libéré, Pèire Coppey, lo PDG de las autoestradas Vinci, anoncièt que la joncha de 92 quilomètres de l’A51 —comunament apelaa liason de Gap a Grenòble— seriá de realizar après 2050, segon la decision de la comission Mobilité 21. Los concessionaris d’autoestradas se devon d’aplicar las decisions de l’Estat e de fach l’SNIT parla degunament de l’avenir de l’A51. Aquela autoestrada dins sa version finala seriá vista coma una via alpencha parallèla a l’A7 (ais europèu n°15, E15) de la valaa de Ròse, coma lo devenguèt la via dau Massís Centrau, l’A75 (E 11), de Besièrs a Clarmont d’Auvèrnhe (sensa parlar a l’oèst de l’A62-A20 [E 9] de Tolosa a Lemòtges).
 
Pasmens, d’elegits sostenon de contunh aqueu projècte coma Andrieu Vallini, lo President PS dau conselh generau d’Isèra, e la deputaa PS de las Autas Alps, Carina Berger, qu’espèran un finançament privat per veire la joncha facha avans 2050.
D’unos parlan de la solucion alternativa de melhorar las vias existentas, subretot l’estrada nacionala n°85 (RN 85) de Gap a Grenòble per Corps, mas egalament l’ais format per las estradas departamentalas RD1075-RD4075 (E712) de Sisteron au Monestier de Clarmont per Lus la Crotz Auta. Los opausants, contents de veire lo rebutament dau projècte, critican l’utilitat de l’A51 sus mai d’un ponch. Primier en dire que lo flux de circulacion seriá pas pron interessant per la rendabilitat de l’obratge —que lo contribuent riscariá de paiar lo deficit—, puei que portariá degun interès economic au sector, los automobilistas passant sensa s’arrestar coma lo ditz l’arreprovèrbi “Los comerçants braman e las veituras passan”. D’autres ancara dison que lo flux de circulacion es fach coma de costuma en Occitània dins lo sens nòrd-sud —aicí de Grenòble a Gap—, mentre que los ais èst-oèst existisson pas —levat de Niça a Baiona—. Se ditz alora que se poiriá desvolopar mai l’ais Gap-Valença e perqué pas l’ais Coni-Valença. D’autres enfin citan Soïssa coma un país montanhòu que l’empachèt degunament d’aver pron d’esquipament en autoestradas. Mas la paraula reven au poler politic. Ferric Cuvillier a dich qu’una mission sarè fiaa a chascun dels prefèctes de region per que puèisse èstre engatjaa una fasa de contractualizacion dels finançaments entre las diferentas collectivitats.
 
Au revenge, foguèt indicat per lo departament de Droma que la mesa en tunèl de l’A7 au nivèu de Valença se fariá dins l’avenir pròche.
 
 
 
 
Laurenç Revèst