Dempuèi qualques jorns e per una brava setmana encara, los vestigis que se tròban jos la carrièra de Mètz, al centre de Tolosa, son visibles de totòm. Dempuèi març, aquela artèria, dins la partida situada entre lo Baloard Carnot e la Plaça Esquiròl, es en òbras. Es un dels obradors grands del mandat 2020-2026 que va tresmudar aquela carrièra plan passanta en espaci per pedons e ciclistas, çò nos explican nòstres confraires de La Dépêche du Midi.

Aquelas òbras importantas, que van durar fins a l’acabada de 2024, se fan jol contraròtle estrech del servici d’arqueologia de Tolosa Metropòli qu’interven a cada estapa. La carrièra, del costat de ciutat bassa, deu aculhir d’arbres. Una granda fòssa prigonda d’1m80 e larga de 3m es estada cavada per aquò far entre las carrièras Malaret e Bolbona.

Es aquí que son apareguts los vestigis del periòde abans la traucada de la carrièra, en 1894. Tot aquel sector èra ocupat per d’ostals que foguèron aquerits alara per la comuna, puèi rasats. Uèi, son las parets de las cavas que sorgisson d’aquel passat, un passat que cobrís en fach mantuna epòca, “de l’Edat Mejana a la Revolucion”, çò estima Christophe Calmats, responsable dels cavaments de carrièra al servici d’arqueologia de Tolosa Metropòli.

Los pans de parets de bricas ròsas, compausats tanben de mortièr, de còdols e de blòcs de marbre, daissan pas indiferents los passejaires. Totòm s’arrèsta per observar e demandar l’origina dels vestigis. Qualques ceramicas copadas e tròces de veire sortisson tanben del sòl. Lo trabalh dels arqueològs a subretot per tòca de cartografiar las traças dels edificis per retrobar lo plan de las abitacions. Se pòdon apiejar per aquò far sul primièr plan cadastral de la vila que remonta a 1680. Aqueles tròces del passat tolosan subreviuràn pas a las òbras, ça que la. Es pas lo primièr còp qu’aquò se produtz a Tolosa, los tolosans se remembran de la pòrta istorica de la vila, retrobada e “copada per error” pendent las òbras del parcatge de la Plaça del Capitòli, o encara del refús de la comuna de far de cavaments serioses pendent las òbras de la Plaça Sant Sernin.