Raportàvem en febrièr passat que lo nombre de refugiats birmans aviá doblat dempuèi lo còp d’estat militar en Birmania, e qu’èran, alavetz, unes 800 000, segon lo Naut Comissariat de las Nacions Unidas pels Refugiats (NACNUR). Ara, un reportatge de The Washington Post ven de desvelar que l’armada birmana agarrís las familhas refugiadas e las perseguís de camp en camp, que las percaça amb d’avions e que s’amagan talament dins la selva qu’an de dificultats per recebre d’ajuda umanitària.

Solament ongan an enregistrat una seissantena d’incursions de l’armada birmana dins Tailàndia per aquela mena de persecucions, çò que buta las autoritats tailandesas a refusar los refugiats.

L’armada de Birmania es acusada de genocidi pels organismes internacionals, mas justifica los atacs en assegurant que los camps de refugiats son de centres de comandament dels grops de la resisténcia, una afirmacion qu’es questionada per l’ÒNU, que soslinha la vulnerabilitat creissenta de la populacion desplaçada. Las familhas fugitivas vivon ara dins de refugis precaris dins lo nòrd de Tailàndia, secutadas per la paur constanta dels atacs aerians indiscriminats.

Podètz legir lo reportatge entièr dins The Washington Post o ben una version en catalan que la prepausa Vilaweb.