capçalera campanha

Actualitats

Internacional

Madrid: granda manifestacion contra l’amnestia dels independentistas catalans

Avián cridat a manifestar una centena d’associacions espanholistas amb lo sosten de la drecha e de l’ultradrecha

Madrid visquèt dissabte passat una granda manifestacion contra l’amnestia dels independentistas catalans après que los acòrdis amb lo Partit Socialista (PSÒE) aguèron capitat a formar un govèrn amb d’autres partits d’esquèrra, d’autonomistas bascos e los partits independentistas catalans.

Jos la devisa “Pas en mon nom: ni amnestia ni autodeterminacion, per la libertat, l’unitat e l’egalitat”, aperaquí un milion de personas segon los organizaires, 170 000 segon lo govèrn espanhòl, s’acampèron en seguida de la crida d’una centena associacions restacadas a l’espanholisme conservator. S’agís de la protèsta mai nombrosa a Madrid contra l’amnestia dels catalans, tenguda sièis jorns après una autra protèsta tanben al centre de la capitala espanhòla e de recampaments tota la setmana davant lo sèti del PSÒE ont se cridèt d’eslogans anticatalans, racistas, islamofòbs e masclistas.

La manifestacion recebèt tanben lo sosten dels caps del drechista Partit Popular e de l’ultradrechista Vox. Los organizaires de la protèsta avián cridat, dins un manifèst, a la mobilizacion ciutadana contra la lei d’amnestia e los acòrdis amb los independentistas.

 

De militars a la retirada demandan un còp d’estat

 

En mai d’aquò, una cinquantena de militars espanhòls retirats a publicat a un manifèst per demandar un còp d’estat que destituisca lo primièr ministre Pedro Sánchez, per la “manca de justícia, egalitat e democracia” dins l’estat espanhòl, e per qu’après lo putsch se convòque tornarmai d’eleccions.

Lo manifèst, que lo sosten l’Associacion dels Militars Espanhòls (AME), soslinha que l’article 8.1 de la Constitucion espanhòla atribuís a l’armada la mission de “defendre l’òrdre constitucional” qu’eles considèran en perilh per la supausada manca d’independéncia judiciària. Los signataris exprimisson lor chepic per l’avenir d’Espanha.

 

 

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Franc Bardòu
2.

"De militars a la retirada demanda un còp d'estat", e aqueste còp, non sèm pas mai en Julhet de 1936 : pas la pena de comptar sus de brigadas internacionalas per anar defendre la democracia dins la peninsula iberica. Se l'Euròpa non enterven pas per empachar aqueste trepejament salvatge de la democracia — e non intervendrà pas, pas mai ni mièlhs que non es intervenguda entre 1945 e 1976, per salvar los Catalans, los Basques ni los Castelhans de la dictatura… Mai que viren los afars, de tot çò mai, se'n chautaràn ben pro, coma de costuma.

E non demandi que de m'i enganar e d'èsser plan suprés…

Tot çò que poiriam far de bon, los ciutadans democratas d'Euròpa, foguèra d'aculhir — e plan dignament, aqueste còp ! — los refugiats republicans. E vistas las politicas migratòrias actualas, non ne prenèm lo camin, tanpauc !

  • 10
  • 6
Torquemada
1.

Castelha a tostemps menat sens contemplacions una cultura politica autoritària e centralizaira.
Dempuèi los Reis Catolics a cercat d'assimilar a sa pagèla tot çò que conquistava. Los Portugueses capitaron d'i escapar. Los autres, los ancians estats de la Corona d'Aragon, après un procèsus de centralizacion del temps dels Absborgs, passèron los las Forcas Caudinas del primièr Borbon, lo Felip V. Es pas per azard que lo rei de uèi se ditz Felip, coma son aujòl, aquel que menèt una guèrra d'asssimilacion de mai de dètz ans. Cal veire sus las fòtos cossí fa lo morre davant las concessions de Sánchez.
Autres còps Torquemada, lo cap de l'Inquisicion, mandava mai que lo Rei. Ara, los jutges que se rebèlon contra lo govèrn de Madrid son los inquisitors de uèi.

  • 11
  • 5

Escriu un comentari sus aqueste article