Un rapòrt del Comitat dels Afars Galeses del parlament del Reialme Unit avertís del perilh d’escantiment numeric que l’afronta la lenga galesa se s’entrepren pas de mesuras immediatas. Segon lo document, Galas e lo galés an una fòrça televisiva que se rebat pas dins lo camp numeric.

Lo comitat soslinha l'importància del contengut en galés dins los rets socials e de la creacion numerica per preservar la cultura e la lenga, e afirma que trobar de contengut en aquela lenga sus las plataformas numericas es extrèmament malaisit. A mai, lo rapòrt avertís que, sens reformas urgentas, “l’escantiment numeric” de las lenga e la cultura galesas es imminent.

Lo rapòrt remarca una casuda d’un 36% dins lo budget d’S4C, lo sol canal de television en galés, dempuèi 2010. Dins aquel sens, prepausa una aliança amb la delegacion galesa de la BBC per refortir S4C. A mai, lo comitat soslinha qu’en Galas, demest las emissions de television mai vistas, tres sus quatre son d’espòrts: sollicita doncas que se garentisca las retransmissions en galés dels principals torneges esportius, mai que mai de rugbi, sus las plataformas numericas. Lo document soslinha tanben lo besonh d’actualizacion de la ràdio en galés.

Lo president del comitat, Hon Stephen Crabb, demanda al govèrn britanic una accion urgenta e que s’apròve una lei que protegisca los canals publics e melhore la preséncia del contengut en lenga galesa sus las plataformas numericas.