CAPÇALERA PAIS INVISIBLE

Actualitats

InternacionalPolitica

Argentina: un president excentric d’extrèma drecha

Admiraire de Trump e Bolsonaro, Javier Milei a amplament ganhat lo segon torn de la presidenciala

Tèxte legit

Javier Milei, candidat del partit d'extrèma drecha La Libertat Avança, a largament superat son adversari, lo peronista Sergio Massa, al segond torn de l’eleccion presidenciala d'Argentina de dimenge passat. La victòria de Milei foguèt tan neta que Massa reconeguèt oficialament sa desbranda tre dimenge de ser abans que se publiquèsse los primièrs resultats oficials.

La victòria de Milei, un candidat qu’a captada l'atencion del public amb son estil excentric e sas posicions d'extrèma drecha, representa un cambiament significatiu de la politica argentina. Lo partit de Milei se formèt fa solament dos ans, en julhet de 2021, e a capitat a batre lo poderós peronisme, fins ara omnipresent dins la politica del país.

Malgrat las criticas e los nombroses moments erratics de Milei long de la campanha, son estrategia de moderacion dins las darrièras setmanas es estada la clau per ganhar lo sosten de l’electorat centrista e indecís. Son mandat començarà lo 10 de decembre.

Dins son primièr discors coma president elegit, Milei a proclamat lo començament de la "reconstruccion" en Argentina e a defendut lo retorn al "modèl de la libertat" per far que lo país venga una poténcia mondiala. Amb de declaracions controversiadas sus de subjèctes coma los crimes de la dictatura militara argentina, lo cambiament climatic, l’avortament e la creacion d'un mercat d'organs, Milei a promés un cambiament radical de la politica argentina.

De veire las reaccions internacionalas a aquela victòria, mai que mai dins un contèxt de tendéncia  creissenta de succèsses de l'extrèma drecha dins lo Mond. Ja l’an benastrugat los modèls de Milei, los èx-presidents ultradrechistas dels Estats Units e de Brasil Trump e Bolsonaro.

 

 

 

 

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Greene
3.

"Excentric" ei un adjectiu, entà jo, que designe, per exemple, un òme que se diferéncie des auti damb era sua manèra de vestir-se. En aqguest cas, cregui que se poiria substituir per "perilhós."

  • 9
  • 2
Lachaud
2.

Si quauqu'a ren a marquat la filosòphia de jornalet es ben la nocion de concept.
L'òm definit lo concept e apres l'òm tira de la conclusion. Aitau si quauqu'un es socialiste o de dreicha li damorara tot lo temps de sa vita e mesme per l'eternitat.
Pertant i a tant de socialisme e de socialistes dins lo monde que de militants socialistes. Parier per la dreicha.
La politica seria aitau figeada per l'eternitat de l'eternitat?
I a qu'une sola politica dins lo monde: l'argent. Qui a pas d'argent demora sens poder. L'argent a lo poder de transformar un dirigeant socialiste en òme d'extrem-dreicha e en far, un colaborator dau poderos.
Seria temps per jornalet de cambiar de filosòfia.
Contre la Finança l'òm pòd ren disian los socialistes qu'an acceptat lo plan Marshal pauç apres 1945, aquel plan que permettet a França . de redressar son economia emben de l'argent que venia daus Estats-Unis.

  • 3
  • 5
Franc Bardòu
1.

Un president "excentric d’extrèma dreita" ? "Excentric", plan segur, ja que per èsser d'un "centre", cal èsser luènh de tot estrem, non ? A contrario, me sembla que l'extremisme expliciti d'un mariòl coma aquel ditz ben pro qu'el non risca de se far valer coma un centrista moderat… Aquest títol me parla donc un pauc coma un pleonasme.

  • 11
  • 4

Escriu un comentari sus aqueste article