Actualitats
Los noiriguièrs de Coseran an protestat contra l’ors en fasent una batuda d’espaurida
Un seissantenat de noiriguièrs, que se dison victimas dels atacs dels orses a pena sortits de l’ibernacion, comencèron dissabte passat a Sant Lari (Coseran) una batuda d’espaurida per alonhar los orses de lors estivatges.
La tòca d’aquela accion, que legalament sonque la pòt menar a tèrme l’ONCFS (Ofici Estatal de la Caça e de la Fauna Salvatja), foguèt d’alertar los mèdias e los poders publics quant a lor exasperacion. Portavan pas d’armas, mas de petards, de campanetas de vacas, de canons per espantar los aucèls... per menar de bruch tant e mai.
“Que i a un gròs sentiment d’exasperacion e d’abatement complet”, çò declarava a Le Nouvel Observateur Gérard Dubuc, cònsol de Sant Lari e sòci de l’ASPAP, una federacion d’associacions opausadas a la preséncia de l’ors. “Que vesèm uei noiriguèrs que non vòlen pas pojar entaus estivatges, pastors descoratjats, estransinats, qu’abandonan la profession. Tròp, b’ei tròp!”.
De lor costat, los defensors de l’ors denoncièron immediatament aquela operacion. L’associacion Ferus demandèt a l’estat francés “una reaccion rapida, activa e sens equivòc en favor de la proteccion e de la mantenença de l’ors en França”. Segon aquela associacion, “entre 18 000 e 30 000 oelhas morissen cada annada en los paisheders deus Pirenèus” de causas divèrsas, una chifra de comparar amb las 272 victimas dels orses oficialament recensadas en 2012.
“Se los tropèths non pojan pas mei, qu’ei l’ors que baisharà”, çò prediguèt lo vicepresident del conselh general d’Arièja, Robèrt Zonch, en tot comentar la batuda a Le Nouvel Observateur. L’elegit del PS, que milita per una “eradicacion de l’ors”, a anonciat que mandarà un corrièr al president francés, François Hollande, per reclamar “l’acantonament deus ors en las comunas que los an desirats”, “l’autorizacion de pòrt d’arma entaus professionaus de la montanha” e “ua vertadèra batuda”.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#2 Tanpòc en Coserans. Eth maire de Sent Lari qu'auriá miélher hèt de parlar eth son gascon localista, mèslèu que non pas un gascon de farlabica!
#4 Non èi cap jamès lejut d'article de jornau on s'i mesclan parlars diferents -deth quau un que'm sembla de farlabica- laguens un medeish article, de tota faiçon. Que sò segur qu'eth maire de Sent Lari de Coserans non aja poscut prononciar eths mots que disetz. Alavetz, non i a cap de rason na cambiar de parlar en article.
Se l'òmi pòt pas anar enlòc shens ac desabestiar tot, qu'ei l'òmi lo qui ei de tròp.
Es pas un bon temps pels orses dins aqueste país. L'autre jorn, senhalàvetz que los elevaires del País Tòi volián tuar l'ors en seguida als aigats. Puèi i aguèt l'orsa escapada del zoo de Sijan. Ara vòlon la pèl d'aquestes que vivon en Coseran.
A l'estiva en Donasan mon rèire-grand dormissía embarrat amb son fusilh dins una cabana de fusta movedissa: l'òme e la bèstia vivián amassa.
Ara, sembla pas pus possible qu'un òme e un ors viscan sul meteis territòri. Pff! Quina pietat per l'animal mai emblematic dels Pirenèus.
Me demandi çò que ne diriá l'ors Martin del film de Flechet...
#8 Sètz pregat d'emplegar pas los comentaris sus Jornalet pels reglaments de comptes personals. Mercés plan
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari