La Collectivitat Europèa d’Alsàcia (CEA) a anonciat son intencion de crear un ofici public de la lenga, çò rapòrta Mediabask. Sa tòca es de “relançar la practica de l’alsacian en creant un ofici public de lenga regionala d’Alsàcia e de Mosèla en 2024”, segon lo president de la CEA, Frédéric Bierry.

Lo nòu ofici public prendrà la forma d’un recampament d’interès public, en s’inspirant dels modèls de l’Ofici Public de la Lenga Occitana (ÒPLO) e sos equivalents pel basco e pel catalan, e permetrà d’associar lo departament de Mosèla, las comunautats de comunas d’aquel departament e los territòris vesins d’Alemanha e de Soïssa.

L’Ofici per la Lenga e las Culturas d’Alsàcia e de Mosèla (ÒLCA), creat en 1994 per la region e los departaments del Naut Ren e del Bas Ren, a saludat aquela iniciativa. Caroline Suss, cap de projècte a l’OLCA, a soslinhat l’importància d’aquela fòrça novèla de tustada, explicant que los uèch salariats actuals son pas sufisents, e a  exprimit sa satisfaccion pertocant la mesa endavant de la transmission, de l’educacion e de la joventut, afirmant que la creacion d’aquel ofici public permetrà a totes los actors de la lenga de coexistir de faiçon mai eficaça.