Coma cada an dempuèi vint e sièis annadas, de centenats d’occitans e catalans s’amassaràn lo primièr dimenge d’agost al Pòrt de Salau, al limit occitanocatalan, per Coserans, a 2100 mètres de nautada. Los participants pojaràn del costat occitan de Salau (Coseran), en tot marchar doas oras e mièja, e del costat catalan d’Esterri d’Àneu (Palhars Sobeiran) en tot caminar qualques 45 minutas. L’amassada es organizada per lo Cercle d’Afrairament Occitanocatalan (CAÒC) coma una escorreguda d’amistat e de revendicacion nacionala dels dos pòbles vesins.
 
Un còp sul pòrt, s’i fa d’actes d’afrairament amb un escambi de produches dels dos costats: de formatge, de vin, de liquors amb de ratafià, de galetas, de chocolat, de carnsalada, etcetèra. Tanben i dançaràn de danças tradicionalas al son dels musicians pirenencs, occitans e catalans. Al delà, se debanaràn, coma d’abitud, los discorses de benvenguda, las cançons e los imnes en issant las doas bandièras.
 
L’emplaçament d’aquel pòrt es simbolic: es un camin natural entre Occitània e Catalonha, qu’a servit istoricament per far de comèrci e per connectar los dos pòbles. Pendent la Guèrra d’Espanha de milièrs de republicans i passèron en essent sus lo camin de l’exili. Normalament los occitans i menan lo formatge del temps que los catalans menan lo vin.
 
L’an passat, en escasença del 25n anniversari de l’amassada, se faguèt un omenatge a Enric Garriga Trullols, que moriguèt en novembre de 2011. Sul pòrt se placèt un panèl en memòria del promotor màger de las relacions occitanocatalanas.
 
Ongan, coma complement, lo dissabte 3 d’agost i aurà ja d’actes del costat catalan. La vila d’Esterri d’Àneu e l’Ecomusèu de las Vals d’Àneu organizan d’eveniments restacats amb l’amassada occitanocatalana.
 
 
 
_____
Mai d’informacion:
– Del costat catalan al CAÒC: tel. 93 284 36 34; caoc@caoc.cat.
– Del costat occitan a ASPIC: tel. 05 61 66 83 70; aspic.salat2@orange.fr.