Dissabte que ven, 9 de decembre de 2023, a 10 oras, la mediatèca de Pinsaguèl (Tolosan) aculhirà Joan-Pau Ferré per una conferéncia sul massacre de Marçolàs (Coserans). L’eveniment, que se tendrà en francés e en occitan, explorarà los tragics eveniments subrevenguts lo 10 de junh de 1944 quand una colomna de la 2a division SS Panzer Das Reich se dirigissiá devèrs Bèthhag.

Pendent aquela conferéncia, Joan-Pau Ferré, autor d’un libre que detalha aquel eveniment, partejarà son raconte. Lo vilatge de Bèthhag èra alavetz mirat, a causa de l’activitat resistenta importanta. Sul camin devèrs Bèthhag, a Marçolàs, los SS executèron 27 abitants, en tot marcar lo 2d massacre pus important de la Segonda Guèrra Mondiala en Occitània après lo d’Orador de Glana (País de Vinhana),

La conferéncia explorarà egalament los eveniments a Bèthhag aquel jorn, la rason per la quala lo vilatge èra mirat, las exaccions contra los civils, los combats, e las accions del maquís de Bèthhag. Près d’ochanta ans après aquelas tragèdias, Joan Paul Ferré temptarà de portar d’elements de responsa per melhor comprene e transmetre aquela memòria.

FERRÉ, Jean-Paul. Betchat, 10 juin 1944, retour sus une journée tragique. Eth Ostau Comengés, 2a edicion, 2022.  120 paginas. 15 èuros.