Nicolas Laffont, 37 ans, jornalista a Ràdio Lengadòc Narbona, foguèt encarcerat lo 15 de novembre de 2023 jos l’acusacion de detencion e difusion d’imatges pedopornografics e de corrupcion de menors. Dijòus, 7 de decembre, la cort d'apelacion de Montpelhièr deviá decidir se lo manteniá en detencion provisòria o lo remetiá en libertat jos de condicions estrictas.

Lo jornalista narbonés reconeguèt que teniá de centenas d'imatges e de vidèos pedofils e qu’aviá realizadas de fòtos d’aquela sòrta sus son luòc de trabalh. Tanben aviá capitat a far d'intervencions al près d'adolescents dins un licèu narbonés, segon Midi Libre. L'acusat declarèt davant lo jutge que planhiá sos actes que quitament que li venián en òdi. A mai afortiguèt que i auriá pas de risc de recidiva e que tornariá pas sus son luòc de trabalh. L'avocat general, totun, soslinha los risques potencials associats a la possession d'un telefòn e d'una connexion internet.

Foguèt mes en causa per de faches similars en Quebèc en 2018 mas profechèt d'una error de procedura per se’n desliurar.