Per la segonda partida, dimars a Nairobi, los kenyans capitèron pas de seguir lo ritme dels Blaus. Aquò s’acabèt sus una plan larga victòria francesa: 108-4.

Mai que las resultas de las partidas, cal sotalinhar l’esperit de la formacion, qu’anèt véser de crocodrils e que rescontrèt d’escolans, e lo ròtle dins la volontat d’espandiment planetari del XIII.

De lor costat, Austràlia e NRL partisson a la conquista d’America. Un contracte ven d’èssser signat amb una cadena de television per la retransmission de las 2 partidas que se jogaràn a Las Vegas. 90 milions de fogals americans poirián èsser tocats!

Elèit 1: fin de las partidas anar

Aqueste dissabte 9 de decembre, se jogavan las partidas de la novena jornada. Dins la fanga, Albi finiguèt que faguèt plegar Pià: 16-0. Fàcia a Sent Gaudenç, Avinhon marca tres ensages dins lo primièr quart d’ora e sèrva l’avantatge per ganhar 24-14. Dins lo primièr temps, Limós e Tolosa fan jòc egal, mas los audencs fan cavalièr sol aprèp la pausa per ganhar 34-12.

A Lesinhan, fàcia als Dragonets, los locals menan 14-4 a la pausa mas marcaràn cap de punts apuèi: çò que permetrà als catalans, mai pragmatics, de véncer 19-14.

L’afar foguèt pas aisit pels primièrs, Carcassona, cò dels darrièrs, Vilanòva. Amb dos ensages d’alièrs, los Canaris menavan 10-0 a la pausa. Mercé a dos ensages transformats, los Leopards prenián l’avantatge 12-10. A 2 minutas del tèrme, Lucàs Albèrt passava la penalitat de l’egalizacion, abans d’ensacar lo tombat de la victòria al punt en aur aprèp doas minutas de prolongacion: 13-12.

Ara, las còlas benefícian d’un temps de pausa fins a la primièra dimenjada de genièr ont se jogaràn los ueitens de la Copa.

Elèit 2: Vilafranca sens desfaita e Selon sens victòria

En Elèit 2,

Vilafranca qu’a pas pogut jogar a Entraigas (arrestat municipal) demòra primièr amb 7 victòrias per 7 partidas jogadas.

Selon a pas ganhat una sola partida e vei Palau ganhar la siá primièra a Selon, justament: 30-16. Tonens monta en poténcia e bat Carpentràs 18-16, alara que Vilagalhenc-Argon domina l’Escura 30-14.

Atal, o saupretz…

• Jonathan Ford, que portèt d’ans lo malhòt del Tolosa Olimpic, abans de partir a Featherstone, ven de signar a Limós.Los melhors: l’International Rugby League ven de designar los melhors de l’annada (lo Golden Boot): James Fisher-Harris pels òmes, Georgia Hale cò de las femnas (aquò fa 2 trofèus per la Nòva Zelanda!) e lo jogaire dels Andidragons e de l’esquipa de França de XIII-cadieral: Jeremi Bourson. Doas francesas èran dins la tièra de las preseleccionadas pel prèmi: Elisa Akpa e Laureana Biville.

• Partida de las Originas: doas seleccions femininas s’afrontaràn aqueste dissabte 16 de vèspre a l’Escura: una seleccion oèst e una seleccion èst.