Se formalizèt dijòus passat la cession de las emissions en occitan de la television barcelonesa Betevé a l’Archiu Occitan de l’Universitat Autonòma de Barcelona (UAB). Desenant, lo depaus numeric de documents d’aquela universtiat conten las emissions “infòc” e “#aranésòc” que s’emetèron setmanièrament sus aquela cadena de television entre los ans 2002 e 2021. Ara, una granda partida d’aquelas emissions es ja consultabla dins lo fons Macip-Zabala: https://ddd.uab.cat/collection/aranesoc?ln=Ca

A l’acte de presentacion participèron de representants importants de l’universitat, de la television, de la Generalitat de Catalonha, del CIRDÒC-Institut Occitan de Cultura e de l’ADÒC, l’associacion que menèt a bon tèrme aquelas emissions.

L’Infòc comencèt en 2003 dins un espaci de mai d’una vintena de lengas e foguèt una remarcada font d’informacion culturala que capitèt a amassar la comunautat occitanofòna de Barcelona, mai que mai d’araneses e de joves estudiants de tota Occitània. Puèi contunhèt fins a 2021 jol nom d’“#aranésòc”. L’espaci televisiu èra desvolopat per l’ADÒC amb la collaboracion de Betevé, las emissions se presentavan en occitan referencial e aranés, e s’i fasiá ausir totas las colors de la lenga nòstra.

“Franc de Bernat Manciet e d’Ives Roqueta, avèm entrevistat totes los grands de la cultura occitana contemporanèa”, çò precisèt Manèl Zabala, president de l’ADÒC.

A l'ora d'ara, l’ADÒC contunha son engatjament per la promocion de l’occitan amb la publicacion de Jornalet dempuèi lo 31 de març de 2012, lo projècte de vidèos legibles “Eth Ligam Occitan” e lo podcast “País Invisible”, ja dins sa segonda sason, qu’a per tòca de far conéisser Occitània, sa lenga, son istòria e sa cultura al public catalan.

Dins aquel eveniment se formalizèt tanplan la cession d’un fons epistolar de Robèrt Lafont e de Bernat Lasfargas del CIRDÒC-Institut Occitan de Cultura en tot establir un ligam istoric occitanocatalan dins lo camp de la recèrca.