La majoritat dels ciutadans franceses (lo 62% d’eles) son partisans de la proteccion de las lengas minorizadas e de la descentralizacion, segon un sondatge que l’a publicatLe Point. Se’n destaca lo sosten significatiu a la descentralizacion: lo 58% de la populacion demanda que las regions ajan mai de poder per triar lors pròprias nòrmas. Aquel vejaire es majoritari entre los mai joves, que l’86% d’eles li donan supòrt.

Pertocant l’autonomia de Corsega, lo sondatge mòstra que lo 47% dels enquistats son en favor d’un estatut d’autonomia, de l’oficialitat del còrs e de la reconeissença d’un pòble còrs, del temps que lo 42% s’i opausan.

Quant a l’identitat dicha regionala, lo 57% dels còrses se senton mai estacats a Corsega qu’a França. Aquel sentiment se tròba tanben dins d’autras regions coma Bretanha e lo Grand Èst, ont se tròban Alsàcia e Lorena.

Segon aquel sondatge, 6 ciutadans franceses sus 10 vòlon donar mai de poder a las regions. Solament lo 42 % dels enquistats crenhon un aflaquiment de l’unitat de la Republica. Aquel lagui es majoritari unicament dins la region qu’a pres lo nom d’Occitània (53 %) e dins la region de Borgonha-Franca Comtat (55 %). Pertot endacòm mai es minoritari, e quitament plan minoritari en Bretanha (29 %).