Toni Negri, important filosòf e dirigent istoric d’Autonomia Obrièra, defuntèt dissabte a 93 ans, çò a raportat sa femna, la filosòfa francesa Judith Revel, mentre que sa filha Anna li rendiá omenatge sus Instagram.

Nascut a Padova en 1933, Negri joguèt los ròtles divèrses de filosòf, de politològ, d’activista e de politician italian, mai que mai pendent los ans 1960 e 1970. Foguèt un dels teoricians màgers de l’esquèrra extraparlamentària, en exercissent una granda influéncia sus tota Euròpa.

Comencèt sa carrièra al Partit Socialista, d’ont s’alonhèt pus tard per venir un dur critic de la socialdemocracia. Après participar a Poder Obrièr, fondèt Autonomia Obrièra en 1973. Foguèt dirigent d’aquela organizacion fins a sa dissolucion en 1979.

Negri foguèt encarcerat lo 7 d’abril d’aquel an en seguida del procès contra de militants d’Autonomia Obrièra, acusat de participar a d’actes terroristas e a una insurreccion armada. Malgrat que foguèsse relaxat d’aquelas acusacions, foguèt condemnat a 12 ans de preson per “associacion subversiva”.

En 1983, Toni Negri, elegit deputat del Partit Radical, se deguèt exiliar en França en setembre. Tornèt en Itàlia en 1997 per complir la pena de dotze ans. Après una lucha juridica, obtenguèt la libertat totala en 2003.

Demest son òbra publicada cal soslinhar Empèri, coescricha amb Michael Hardt, que lo faguèt conéisser internacionalament, delà los cercles de l’esquèrra revolucionària. Aquel libre venguèt un tèxt de referéncia del movement contra la globalizacion capitalista. Puèi, Negri contunhèt de far de recèrcas sus de tèmas restacats a la democracia globala e las dinamicas socialas dins d’obratges coma Multitud (2004).