Lo president de la region e del Partit Socialista de Lengadòc-Rosselhon, Christian Bourquin, envièt diluns passat una letra (document çai jonch) al president de l’UMP Jean-François Copé amb un chèc de 150 èuros per “l’ajudar a pagar abans lo relambi los 11 milions d’èuros que deu lo partit” en seguida de l’invalidacion dels comptes de campanha de Nicolas Sarkozy.

Bourquin ditz dins son blòg que vòl “ajudar l’UMP a sortir de la desastrosa situacion financièra” e justifica lo don perque “la democracia a de besonh de partits fòrts, solids e plan estructurats per l’exercir plenament”. Al delà, tanben afirma qu’a decidit de far una contribucion de 150 èuros “per traire l’UMP del cuol de sac que son ancian president (Sarkozy) l’i a menat”.
 
Borquin o aprofiècha tanplan per criticar la politica d’aquel partit. “D’autres metòdes de gestion se serián poguts menar a tèrme aisidament, ne soi segur, per evitar aquesta situacion”, çò ditz.
 
Tocant la proximitat de las eleccions municipalas e davant los eventuals acòrdis locals de l’UMP amb lo Front Nacional (FN), Bourquin convida l’UMP e lo sieu patron a despassar pas “cèrts limits republicans”.
 
Las reaccions dels mèdias de tot l’estat francés e del quite Partit Socialista son estadas nombrosas.
 
Cal remembrar que lo president de l’UMP, Jean-François Copé, lancèt lo 4 de julhet passat una granda soscripcion estatala, après que se confirmèsse lo refús del Conselh Constitucional dels comptes de campanha de las darrièras eleccions presidencialas de 2012 de Nicolas Sarkozy. Divendres, lo president de l’UMP lancèt una darrièra crida als dons. A l’ora d’ara se son amassats aperaquí 7 milions d’èuros, suls 11 que lo partit deu pagar abans la fin del mes. Aquela quantitat correspond a l’argent public que devon tornar.
 
S’en luòc d’ajudar la politica francesa, volètz sosténer la premsa occitana en occitan, podètz far un don a Jornalet. Avèm pas besonh de tantes milions.