Lo nombre d’emplegats bascofòns del Servici Basco de la Santat (Osakidetza) s’es multiplicat per sèt aquestes darrièrs 20 ans, en passant del 7,6% al 51%, çò rapòrta lo govèrn de la Comunautat Autonòma del Bascoat (províncias d’Alaba, Biscaia e Guipuscoa). Aquela donada rebat d’esfòrces realizats dempuèi l'aprobacion del decret de normalizacion de l’usatge del basco.

En 2017 s’establiquèt un procès de normalizacion de la lenga basca dins la santat publica de la region, amb d'objectius, de prioritats e de mesuras basicas per garentir los dreches lingüistics dels usatgièrs. Aquestes darrièrs 20 ans, Osakidetza a prepausat 58 631 corses de lenga basca als professionals sanitaris per assegurar que compliscan las requeréncias lingüisticas de lors emplecs.

Segon los sondatges d’Osakidetza, en 2022 un impressionant 77,2% dels usatgièrs se mostrèt satisfach de l’usatge e de la preséncia del basco dins la santat publica.

La ministra regionala de la santat basca, Gotzone Sagardui, a exprimit un vejaire fòrça positiu sus l'avançada del basco dins l’encastre de la santat. Pasmens, avertís que i a encara fòrça trabalh de far dins lo domeni lingüistic.

Malgrat aquela reüssida, un estudi de Soziolinguistica Klusterra publicat en mai de 2022 soslinha que l'usatge de la lenga basca s'es estancat aquestes darrièrs ans. Segon lo rapòrt, sonque un basco sus uèch parla la lenga, çò que mòstra una leugièra tendéncia descendenta dempuèi 2006, malgrat un petit aument d’ 1,8 ponches percentuals dins los darrièrs cinc ans, çò rapòrta lo Diari de la Llengua.