Los transpòrts en comun de Montpelhièr e sa metropòli son desenant gratuits per son mièg milion d’estatjants. Es aital que lo ret de transpòrt de la capitala bas- lengadociana es lo pus grand d’Euròpa a aviar aquela mesura, çò rapòrta Libération. Aquela iniciativa s’inscriu dins lo movement entreprés per d’autres ciutats coma Dunquèrca (Flandra) e Tallinn (Estònia).

La gratuitat comencèt ièr dijòus a 19h coma o aviá anonciat Michaël Delafosse, cònsol màger de Montpelhièr e president de Montpelhièr Mediterranèa Metropòli.

Delafosse estima qu’aquela accion audaciosa es a l’encòp desirabla per la societat e benefica per la planeta, en soslinhant son engatjament en favor de l’ecologia populara.

La gratuitat dels transpòrts a per dobla tòca d’encoratjar los desplaçaments mens polluents e d’ajudar a combatre la crisi climatica. Lo projècte cèrca egalament de demostrar que la transicion ecologica pòt coexistir amb la justícia sociala. A mai de voler aparar l’environament, la gratuitat dels transpòrts es una mesura universala que benefícia a totes los ciutadans.

En acompanhament d’aquela mesura, la vila prevei un fòrt desvolopament de son ofèrta de transpòrts en comun, amb la construccion de la cinquena linha de tramvai en 2025, l’extension de la primièra cap a la nòva gara TGV e la creacion de cinc linhas de bus-tram. L’objectiu es que lo 90 % dels abitants de Montpelhièr e lo 70 % dels de las autras 30 comunas de la metropòli ajan près de lor ostal una estacion de transpòrt en comun.

E mai la gratuitat dels transpòrts pòsca suscitar de debats e d’oposicions, Michaël Delafosse soslinha la volontat de defendre aquela mesura, la jutja possibla e desirabla per la societat e la planeta e prevei qu’aquel debat jogarà un ròtle central dins las eleccions municipalas previstas per la prima de 2026.