capçalera campanha

Actualitats

Internacional

Se multiplica las atacas aerianas turcas sus Rojava

L’ofensiva turca s’intensifiquèt diluns, jorn de Nadal, e tustèt 22 zònas civilas dins aquela region curda de Siria

S’intensifican los atacs aerians turcs sus Rojava
S’intensifican los atacs aerians turcs sus Rojava | Baderkhan Ahmad

Tèxte legit

De milièrs de personas se recampèron en dòl dimars passat a Qamişlo per rendre omenatge a las sièis personas tuadas per las atacas aerianas de l’armada turca. Qamişlo es la capitala de facto de Rojava, çò es lo Curdistan sirian. Los recents bombardaments aerians de l’aviacion turca an tustadas de zònas civilas de las vilas de Qamişlo, d’Amuda e de Kobanî, e an fach un total d’8 mòrts e 13 nafrats en destrusent de sits industrials, una gara e un espital, çò rapòrta MedyaNews.

L’ofensiva de Turquia s’intensifiquèt diluns, jorn de Nadal, e afectèt 22 zònas civilas d’aquela region curda. Lo Partit de l’Egalitat dels Pòbles e de la Democracia (DEM) a fermament condemnats los bombardaments en los qualificant de crimes de guèrra, e demanda una intervencion internacionala per metre lo ponch final a la violéncia de l’estat turc. Lo DEM a criticada la coalicion dels partits AKP e MHP (drecha e extrèma drecha nacionalista) que sostenon la presidéncia de Recep Tayyip Erdoğan. Los acusa de mirar los curds pel biais d’agressions òrbas contra de colònias civilas.

L’Union de las Comunautats de Curdistan (KCK), a egalament exprimida sa posicion, en jutjant que los bombardaments son de temptativas de dissimular una “pesuga desfacha” contra las fòrças de guerilha curdas, e a cridats los peshmèrgas a se distanciar de las posicions militaras turcas.

 

 

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Franc Bardòu
1.

Tròbi aquò per çò mendre estranh : se d'abrutits dominats sense pietat per un ancian rus del KGB envasisson Ucraina, totes los medias dominants brandisson las pelhas. Se d'abrutits menan d'accion terroristas integristas religiosas contra Israël, totes los medias dominants brandisson las pelhas. Se d'abrutits israelians d'ultradreita matrassan de populacions civilas palestinianas, totes los medias alternatius brandisson las pelhas. Mas s'un estat dominat per un abrutit integrista religiós turc matrassa d'atacas aerianas de populacions civilas curdas (luchant despuèi longtemps contra unas rets integristas terroristas internacionalas, totun) dins un autre estat que lo sieu, a despart de Jornalet, totòm se'n chauta… La geografia francesa dels conflictes, sul plan mediatic, es particularament a geometria variabla ! Es a se demandar cossí los jornalistas franceses s'i prenon per se repairar subre una mapa…

  • 4
  • 1

Escriu un comentari sus aqueste article