capçalera campanha

Actualitats

InternacionalPoliticaSocietat

Primièr objector de consciéncia israelian dempuèi la crisi de Gaza

“Una campanha de venjança a començat non solament contra l’Hamas, mas tanben contra l’ensemble del pòble palestinian”, çò ditz dins sa letra

Tal Mitnick, de 18 ans, ven lo primièr objector de consciéncia de la guèrra entre Israèl e Hamas
Tal Mitnick, de 18 ans, ven lo primièr objector de consciéncia de la guèrra entre Israèl e Hamas | Oren Ziv / +972 Magazine

Tèxte legit

 

Tal Mitnick, de 18 ans, ven lo primièr objector de consciéncia de la guèrra entre Israèl e Hamas. Foguèt encarcerat dijòus passat  dins una preson militara de la basa de Tel Hashomer, dins lo centre d'Israèl, çò rapòrta l'organizacion Mesarvot, que lucha pel refús del servici militar. L'incident a atirada l’atencion internacionala, malgrat que Tsahal aja pas comentada publicament la question.

En Israèl, lo refús d'èsser enrotlat es generalament passible d'una pena de preson, e mai cèrtas personas cèrquen d'autres camins per evitar lo servici, per exemple en fornissent de pròvas de problèmas medicals o mentals. Se l'armada israeliana a de còps acceptats de refuses fondats sus un pacifisme general, las objeccions especificas ligadas al conflicte local son rarament reconegudas.

Mitnick a refusat de jónher las fòrças armadas israelianas e escricha una letra dobèrta que Libération publica integralament traducha en francés.

Dins sa letra, Mitnick soslinha la complexitat de la tèrra, partejada per doas nacions amb de ligams indiscutibles, e critica la cresença en un èsser suprèm que vei la tèrra coma proprietat exclusiva d'una sola comunautat. Rebuta l'idèa que la violéncia pòsca resòlver aquel problèma e denóncia tant las accions de l’Hamas coma de l'armada israeliana. Afortís que i a pas cap de solucion militara a un problèma politic, e remarca lo besonh de dialòg e compreneson e d’una solucion basada sus la justícia e la libertat.

Mitnick considèra que la vida es sagrada, apara lo dialòg e critica las responsas violentas coma mejan per refortir lo sosten al govèrn e far calar las criticas. Per el, l’idèa que mai de violéncia portarà mai de seguretat es falsa, e l’objector de consciéncia  sosten un cambiament politic e diplomatic coma la sola manièra d’empachar mai de destruccion e de vidas perdudas. Enfin, Mitnick exprimís sa conviccion que lo cambiament vendrà del pòble, non pas dels politics corromputs, e crida a la compreneson e la justícia coma basa d’una patz duradissa.

La letra de Mitnick aficha un vejaire inedit en Israèl, ont de mond chepicat per las politicas e las accions que perpetuan lo conflicte creson que la solucion vendrà de la societat israeliana s'enfin dona pas pus lo poder als supremacistas.

 

 

 

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article