An descobèrt un vilatge neolitic vièlh de 5000 ans a Culhat (Limanha), çò rapòrta La Montagne.

En 2019, lo cercaire de l’universitat de Clarmont-Ferrand, remarquèt los vestigis d’un vilatge neolitic en un endrech sonat “Bacinet”. Ara, las excavacions fachas jos la direccion de Nina Parisot, doctora en Preïstòria a l’universitat de Lion, revèlan una estructura monumentala de 70 mètres de long sus 15 mètres de larg, unica en Auvèrnhe. A mai, an descobèrt de tèstes, de pèças de silex, de vaissèla e de tròces de terralha... çò qu’ofrís un apercebut de l’organizacion sociala e del mòde alimentari de l’epòca. De rèstas de carbon amb de granas carbonizadas, aital coma de traças de postèls de fusta, evòcan l’existéncia d’abitacions.

Parisot a presentadas sas primièras descobèrtas en soslinhant l’importància de melhor comprene l’istòria sociala del sit.

De son caire, la comuna vei dins aquela trobalha una oportunitat de desvolopament toristic e economic, afortissent los ligams socials.

Una crida a la populacion s’es lançada per mobilizar de benevòls e d’estudiants en vista de las excavacions previstas sus tres ans a partir de l’estiu d’ongan.