Lo cap del govèrn espanhòl, Mariano Rajoy, compareguèt ièr dijòus davant los deputats del Congrès “per desmentir las messòrgas” del cas de corrupcion qu’afècta lo Partit Popular (PP) e ne responsabilizèt l’èx-clavaire, Luis Bárcenas, en eludissent las acusacions. Mentre que tot l’estat espanhòl critica aquela situacion al mitan de la crisi economica, Rajoy sonque reconeguèt, davant lo Parlament d’Espanha, que s’èra enganat al moment de se fisar de l’èx-clavaire del sieu partit, imputat per corrupcion e suspècte de portar una comptabilitat oculta.
 
“Me sentisi pas menaçat per res que siá contemplat dins la Constitucion”, çò afirmèt Rajoy al començament de sa comparucion davant los deputats. “M’enganèri que me fisèri de qualqu’un qu’ara sabèm qu’o meritava pas”, çò afirmèt en assegurant que “dins lo PP s’es pas portada cap de dobla comptabilitat, nimai s’i amaga pas cap de delicte”.
 
Reconeguèt que lo sieu partit paguèt “de remuneracions complementàrias” a de dirigents per lor “trabalh” e soslinhèt que, malgrat son implicacion polemica dins aquel escandal de presumida corrupcion, quitarà pas lo govèrn.
 
Davant aquelas declaracions; lo representant del Partit Socialista (PSÒE), Alfredo Pérez Rubalcaba, questionèt Rajoy, en disent que se condusiá pas coma lo president d’un país, “mas coma lo president d’un partit qu’a viscut illegalament”. “Sètz vengut uèi aicí per nos dire que lo PP aguèt un clavaire desleial que vos a enganat pendent vint ans (…) e aquò o podèm pas creire”, çò apondèt Rubalcaba, en tot remarcar que lo PP aviá ganhadas las eleccions amb un “sistèma de finançament illegal”.
 
Totes los autres partits carguèron tanben contra Rajoy. Lo pòrtavotz de la formacion catalanista CIU, Josep Antoni Duran Lleida, diguèt que las explicacions del president espanhòl èran pas sufisentas. De son costat lo representant d’ICV (esquèrra ecologista) acusèt lo president de corromput e a l’encòp acusèt lo PP de corrompre tot çò que tòca.
 
“Delenda est Rajoy!”, çò diguèt lo representant d’ÈRC (esquèrra catalanista) en remarcant que la credibilitat del president espanhòl èra nulla. Bosch ne profechèt per demandar a Rajoy de respondre a la letra que lo president Artur Mas li envièt en demandant de permetre un referendum sus l’independéncia de Catalonha.
 
Lo pòrtavotz del Partit Nacionalista Basco (EAJ), Aitor Esteban, diguèt que fin finala aviá comprés cossí lo PP podiá emplegar tant d’argent en campanha mentre que los autres partits èran a far de reduccions budgetàrias. “Mas çò mai marrit es que los partits qu’avèm pas aquel finançament nos volètz retalhar mai encara”, çò planguèt lo deputat basco.
 
Lo deputat valencian d’esquèrra, Joan Baldoví, demanèt d’eleccions avançadas pr’amor que cal daissar parlar lo pòble. Per obténer de far aquelas eleccions, Baldoví demandèt l’unitat de totes los partits de l’oposicion, es a dire totes levat lo PP, que se preval de sa majoritat absoluda per governar dins aquela situacion escandalosa.
 
Cal dire que lo PP profechèt tanben de sa majoritat absoluda per empedir la comparucion del president, que s’es vist pasmens forçat de comparéisser davant la menaça d’una mocion de censura. La comparucion s’es facha dins la bastissa del Senat, pr’amor que lo Congrès dels Deputats es en òbras de reabilitacion.
 
Fin de citacion
 
Pendent la comparucion, lo president espanhòl Mariano Rajoy a emplegat constantament l’expression “fin de citacion” (en espanhòl “fin de la cita”). Tant, que l’etiqueta #findelacita es venguda un grand tèma de convèrsa sus Twitter e quitament dins la cambra parlamentària. E mai es venguda lo tèma dominant mondial, amb fòrça usatgièrs e qualques mèdias de tot lo Mond que se trufan de Rajoy, qu’el legissiá aquelas indicas entre parentèsis dins son discors.
 
 
L’afar Bárcenas
 
Lo 31 de genièr passat, lo jornal espanhòl El Paíspubliquèt una seguida de documents nomenats “los papièrs de Bárcenas”, que mostravan d’evidéncias de l’implicacion de l’èx-clavaire del PP en d’afars de corrupcion coma l’emblanquiment d’argent.
 
Segon las informacions desveladas per aquel jornal, Luis Bárcenas distribuiguèt d’argent, procedent de dons d’entrepresas privadas, als nauts responsables del PP pendent sa gestion coma administrator d’aquela fòrça politica.
 
Luis Bárcenas compareguèt davant la justícia lo 15 de julhet passat pel supausat finançament illegal del PP realizat dins los darrièrs vint ans. Es acusat de malversacion de fonzes, de blocar d’argent, de portar una dobla comptabilitat e de pagar de gratificacions a de membres del PP.
 
L’escandal es vengut de mai en mai gran tre que lo jornal El Mundo, mai d’un còp, a publicat mai de documents sus l’afar e quitament los SMS de telefòn mobil que s’èran mandats Mariano Rajoy e Luis Bárcenas. Segon aqueles messatges se prometiá a Bárcenas qu’intrariá pas en preson. E es precisament tre que l’èx-clavaire intrèt en preson que sa declaracion desvelèt un escandal de finançament illegal e de gratificacions en negre que tocariá lo president espanhòl, Mariano Rajoy, e qualques membres del sieu govèrn.
 
D’autre caire, cal dire que i a un sector del PP qu’es pas dins lo govèrn, qu’es guidat per l’èx-president José María Aznar e qu’es a desligitimar lo govèrn de Mariano Rajoy. Lo director del jornal El Mundo es partisan d’aquela còla.