Actualitats
Las crisis que poirián empejorar en 2024
La guèrra en Gaza a causada una crisi umanitària, Sodan viu la crisi de desplaçats màger del Mond e la guèrra en Ucraïna s’es estancada
Tèxte legit
Las crisis que poirián empejorar en 2024
La guèrra en Gaza a causada una crisi umanitària, Sodan viu la crisi de desplaçats màger del Mond e la guèrra en Ucraïna s’es estancada
L’an 2023 s’es ben destacat coma pontannada de crisis sens precedent qu’en 2024 poirián èsser piègers, segon The Washington Post. D’efièch, lo conflicte en Ucraïna s’es estancat en una guèrra de posicion desolanta, del temps qu’en Orient Mejan, la guèrra en Gaza a causada la mòrt de 20 000 palestinians e una crisi umanitària. D’autras regions coma Sodan e Birmania patisson de guèrras civilas devastairas, en provocant de desplaçaments massisses e en daissant de milions de personas en besonh d’ajuda umanitària. Lo rapòrt mençona tanben las tensions entre la Republica Populara de China e Taiwan, e Haití contrarotlat per las màfias qu’es a mand de s’escrancar coma estat.
Amb lo govèrn de Biden consagrat a sosténer la resisténcia d’Ucraïna, la capacitat de tractar d’autras crisis se poiriá veire limitada. Las eleccions en Taiwan e la situacion en Birmania, amb una junta militara afeblida, contribuisson a l’incertitud globala, amb d’enjòcs que se poirián agreujar durant 2024.
Sodan e Gaza, las doas principalas crisis de seguir
De son caire, l’International Rescue Committee (IRC) considèra lo conflicte en Sodan e la guèrra en Palestina coma las doas principalas crisis de seguir en 2024. La polarizacion etnica e la manca d’accès umanitari explican perqué son de situacions alarmantas. Sodan viu a l’ora d’ara la màger crisi de desplaçats del Mond.
L’instabilitat politica en Africa, mai que mai en Burkina Faso, Mali e Nigèr, anóncia de marrits presagis. Aqueles païses, amb d’autres de la “lista de susvelhança” de l’IRC, representan l’86% de las personas qu’an de besonh d’ajuda umanitària a l’escala mondiala.
L’interseccion entre guèrra e crisi climatica
En mai de tot aquò, 2023 demòra dins las memòrias coma l’an mai caud jamai enregistrat, amb de desastres climatics coma las inondacions dins lo nòrd-èst de Libia, que causèron mai d’11 000 mòrts.
Los caireforcs entre conflictes e crisi climatica indican que se complexifica de contunh los problèmas globals.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
E òc , crisis, chaples, guèrras, catastrofas de totis biaisses, bon, ben, fins finala, coma o-disian nòstres aujòls romans "res novi sub solis" , I-a pas res de novèl jol solèlh.
Dins lo monde la guerra internacionala que durava dempuei fòra longtemps s'acaba e l' òm es deja a veire venir un autre mòde de representacion internacionala. Coma en 1945, l'ONU e totas sas associacions van dispareisser per esser remplaçada per autra causa. Lo nòu conselh de securitat devria esser constituat de sets districts: totas las Americas, l'Euròpe e Russia, l'Africa, los pais musulmans, China, l'Inda, los pais de l'Asia dau sud-Est.
I aura pas de novelas ofensivas en Ukraina que los Etats -Unis e l'Euròpe an usat tot lòr argent et totas lòrs fòrças militarias dins aquela guerra. Los pais occidentaus son en deficit. L'òm parla pas de França, mas França a perdegut sas colonias que li raportavan de l'argent. I aura pas de plan Marschall per una novela "tres gloriousas' coma dins las annadas 1960/1970.
Dins l'OTAN la prumiera armada es aquela de Turquia. Biden a pus de poder e los governaments europeens van coneissser la crisa politica.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari