Pendent tot lo mes de decembre, fòrça menaires occitans recebèron de multas per excès de velocitat enregistrat per un radar installat a Porra, una localitat situada al nòrd de Ventimilha, sus la rota que mena a la val de Ròia, çò rapòrta France 3. Lo radar sanciona los veïculs que supèran los 50 km/h, en direccion del nòrd. Los menaires multats aqueste estiu an recebudas las sancions quatre o cinc meses mai tard, çò qu’aital abolís tot l’efièch pedagogic que lo deuriá aver aquel tipe de radar.

Cèrts menaires sancionats an recebudas fòrça emendas a l’encòp, enviadas dels Païses Basses estant (las contravencions son notificadas per una societat neerlandesa) e amb un tèrme de pagament de cinc jorns jos pena de majoracion. Aquò a encolerits los que circulan amb regularitat per aquela estrada entre Menton e Brelh de Ròia, qualques unes dels quals an recebut fins a 30 sancions lo decembre per d’excèsses de velocitat comeses entre julhet e la debuta de setembre.

Qualques politicians an criticada la situacion. Es lo cas del cònsol màger de Brelh de Ròia, Sébastien Olharan, qu’a demandat “lo retirament a minima d’aqueu radar qu’es a mon vejaire unicament fach per ganhar d’argent, e segurament pas dins un ver interès de lucha còntra l’inseguretat estradiera”.