Lo govèrn espanhòl ven de prepausar una lei per empedir l’autoconsume d’electricitat. Segon aquel nòu còde, se pòt pagar de multas de 30 milions d’euros s’òm capta l’energia del Solelh per far d’electricitat, segon çò que denonciava lo jornal alternatiu Kaosenlared. Aquel jornal soslinhava que las companhiás electricas d’Espanha son administradas per de conselhièrs, d’èx-presidents e d’èx-ministres dels dos principals partits de l’estat, PSÒE e PP, e que poirián aver influit dins la propòsta d’aquela lei.
 
Lo crit d’alarma venguèt de l’Union Espanhòla Fotovoltaïca (UNEF), l’associacion de productors d’electricitat per energia voltaïca, que remarquèt lo projècte de lei que lo govèrn espanhòl cèrca d’aprovar per decret. “S’empedís l’estalvi als consumaires e se paralisa l’intrada d’una nòva concurréncia dins lo mercat electric”, çò denóncia l’UNEF.
 
Una peticion ciutadana s’es lançada per demandar a l’estat espanhòl lo liure autoconsume de las energias alternativas coma la solara, l’eoliana e la de la mar.